Qazaqstanda koronavirýs juqtyrǵandar men qaitys bolǵandar esebin júrgizý jumysy qatańdatylady. Budan bólek KVI+ pen KVI- statistikasy biriktirilýi múmkin. Bul týraly densaýlyq saqtaý vitse-ministri Ajar Ǵiniiat málimdedi, dep habarlaidy Sputnik Qazaqstan.
Prezident úkimettiń keńeitilgen otyrysynda óńirler naýqastar sanyn jasyratynyn málimdep, koronavirýs statistikasyn naqtylaýdy tapsyrǵan bolatyn.
Ǵiniiattyń aitýynsha, qazir densaýlyq ministrligi ulttyq statistika biýrosymen birlesip jumys istep jatyr.
"Aýyrǵandar men ólim-jitim esebin júrgizýdi jáne tirkeýdi qatańdatý úshin belgili bir jospar qabyldanyp, qujattar qaralyp jatyr. Barlyq meditsinalyq uiym jyldyq esepterin daiyndap, tapsyryp jatyr. Biz KVI+ jáne KVI- ár faktisin búkil bazadan tekserip, ár patsientti JSN-y boiynsha baqylaimyz. Qazir bul baǵytta úlken jumys júrip jatyr. Aidyń sońynda koronavirýs boiynsha málimetter jańartylady", - dedi vitse-ministr onlain brifingte.
Ol jaz kezinde naýqastar kóbeiip, dárigerler derekterdi bazaǵa der kezinde engizip úlgermegenin aitty. Málimetter júiege keshirek engen. Sonyń saldarynan statistika durys júrgizilmedi.
BAQ ókili koronavirýstyń rastalǵan (+) jáne rastalmaǵan (-) jaǵdailary biriktirile me degen suraqqa:
"Biz biriktirýimiz múmkin. Qazir koronavirýstyń ár faktisin, + jáne -, jeke-jeke esepteimiz. KVI+ boiynsha eshqandai másele joq. Al KVI- boiynsha ózgerister bolady dep oilaimyn", - dedi Ǵiniiat.
