QR Memlekettik bas sanitarlyq dárigeri Aijan Esmaǵambetova koronavirýs infektsiiasy boiynsha testten ótýi tiis adamdar sanatynyń tizimi keńeitilgenin málim etti, dep habarlaidy QazAqparat.
«Eldegi ahýalǵa bailanysty 14 sáýirde karantin sharalaryn kúsheitý boiynsha qaýly shyǵardym. Oǵan sáikes aýrýhanalardyń bári de epidemiiaǵa qarsy kúsheitilgen rejimge kóshedi. Iaǵni, aýrýhanadaǵy ár patsient – koronavirýs juqtyrǵan adam retinde kúdikke ilinedi. Meditsinalyq uiymdar men aýrýhanalardyń barlyq qyzmetkerleri aýrýyna jáne diagnozyna qaramastan patsientterdi qabyldap, diagnostika júrgizedi. Sonymen qatar karantin jáne provizorlyq statsionarlarǵa, infektsiialyq statsionarlarǵa talap kúsheitildi. Statsionarlarda beinebaqylaý kameralary ornatylyp, tiisti jeldetý júiesi jolǵa qoiylýy tiis. Meditsinalyq uiymdardyń ár aýysymy bir-birinen oqshaýlana júrýi kerek», - dedi Aijan Esmaǵambetova OKQ-da onlain rejimde ótken baspasóz máslihatynda.
Memlekettik bas sanitarlyq dárigerdiń aitýynsha, meditsinalyq uiymdarda personaldarǵa taza bólikten las bólikke (nemese kerisinshe) ótýge tyiym salynady.
«Bas dárigerlerdiń bári de jeke qaýipsizdik quraldarymen qamtamasyz etilýi kerek. Sonymen qatar dezinfektsiialyq rejimniń qatań saqtalýyn da qamtamasyz etý qajet. Meditsina qyzmetkerleri de qyzmet babynda abai bolyp, infektsiialyq qaýipsizdikti saqtaýy tiis», - dedi ol.
Aijan Esmaǵambetova sonymen qatar testten ótýi tiis adamdar sanatynyń tizimi keńeitilgenin jetkizdi.
«Qazirgi tańda júkti áielder, júrek, qan tamyrlary, tynys joldary boiynsha sozylmaly aýrýy bar adamdar da koronavirýs infektsiiasy boiynsha kúdikte bolmasa da testten ótýge mindetteledi», - dep túidi Memlekettik bas sanitarlyq dáriger.
