Qazaqstanda kópbalaly otbasylarǵa páter berý bastaldy, dep habarlaidy "Ult aqparat" primeminister.kz silteme jasap.
QR Tuńǵysh Prezidenti N. Nazarbaevtyń tapsyrmalaryn oryndaý aiasynda Qazaqstanda kópbalaly otbasylarǵa baspana berý jumystary bastaldy. Turǵyn úi qatynastary máseleleri jónindegi jańa zańdy iske asyrýdyń alǵashqy kúni elordada jáne elimizdiń óńirlerinde 249 otbasy baspanaly boldy.
Biyl 30 sáýirde kópbalaly otbasylardy baspanamen qamtamasyz etý maqsatynda QR Parlamenti turǵyn úi qatynastary máseleleri jónindegi zańdy qabyldady. Qujatty iske asyrý QR Úkimetine ákimdiktermen birlesip qysqa merzim ishinde elimizdiń barlyq óńirlerindegi kóp balaly otbasylarǵa páter berýdi bastaýǵa múmkindik berdi.
Prezident Ákimshiliginiń, QR Parlamenti men Úkimetiniń úilesimdi atqarǵan jumystarynyń nátijesinde az qamtylǵan otbasylardyń turǵyn úi jaǵdailaryn jaqsartýdyń júieli sharalary qabyldandy.
Biyl mamyr aiynda jalpy elimizde 2019 jylǵa josparlanǵan 6 myń kóp balaly otbasynyń 1,2 myńyn baspanamen qamtamasyz etý kózdelgen.
Búginde alǵashqy 24 páter Nur-Sultan qalasynda, 15-i Shymkent qalasynda berilgen. Pavlodar oblysynyń kópbalaly otbasylaryna - 76, Qaraǵandy oblysynda - 27, Aqtóbe oblysynda - 25, Almaty oblysynda - 20, Mańǵystaý oblysynda - 18, Jambyl oblysynda - 17, Shyǵys Qazaqstan oblysynda - 11, Batys Qazaqstan oblysynda - 10, Aqmola oblysynda - 6 páter berildi.
15 mamyr kúni Atyraý oblysyndaǵy 50 kópbalaly otbasyny turǵyn úimen qamtamasyz etý josparlanǵan.
Jergilikti atqarýshy organdardyń bergen málimetine sáikes, 32 myń kóp balaly otbasy baspana alýǵa kezekte tur.
Kóp balaly jáne az qamtylǵan otbasylardy turǵyn úimen qamtamasyz etý boiynsha alǵa qoiylǵan mindetterdiń iske asyrylý barysy QR Úkimetiniń erekshe baqylaýyna alynǵan.
