Foto: iStock
Qazaqstanda konstrýktor-avtokólikterdi zańdastyrýǵa ruqsat etildi, - dep habarlaidy "Ult aqparat" Úkimettiń baspasóz qyzmetine silteme jasap.
"Jyl basynan beri Memleket basshysynyń tapsyrmasyn oryndaý aiasynda qazaqstandyqtarǵa 2022 jylǵy 1 qyrkúiekke deiin Qazaqstanǵa ákelingen sheteldik avtokólikterdi zańdastyrýǵa múmkindik berildi. Al, buǵan deiin elge qosalqy bólshekter retinde ákelingen kólik ieleri resmi tirkeý qujattarynyń joqtyǵynan qiyndyqtarǵa tap boldy.
Úkimet bul máseleni sheshý úshin azamattarǵa konstrýktor-avtokólikterdi zańdastyrýǵa jáne bastapqy tirkeýdi júzege asyrýǵa múmkindik beretin tiisti erejelerge ózgerister engizdi. Mundai kólik quraldaryn bastapqy tirkeý úshin alym mólsherlemesi 200 myń teńge bolady", - delingen habarlamada.
Tirkelý úshin:
- ótinish;
- ishki ister organdarynyń ýákiletti qyzmetkeri bergen kólik quralyn tekserip-qaraý aktisi;
- tehnikalyq tekserip-qaraýdyń diagnostikalyq kartasy bolýy qajet.
