Sýret: egemen.kz
QR Ulttyq ekonomika ministri Álibek Qýantyrov 2023 jyly kommýnaldyq tarifter ósetinin aitty, dep habarlaidy QazAqparat.
Búgin Senattyń jalpy otyrysynan keiin tilshiler ministrden elimizde jelilerdiń tozýy kórsetkishine qarai tarifter qalai ózgeretinin surady.
«Kelesi jylda, iaǵni ekinshi jartyjyldyqtan bastap tiisti ózgerister bolady. Sebebi sýbektilerge, sodan keiin memlekettik menshikte bolatyn sýbektilerge óz jumysyn jańǵyrtyp, jelilerdi jańartý kerek. Prezident sailaýaldy baǵdarlamasynda tiisti kórsetkishterdi belgiledi. Osy oraida júrgizilgen esepteýlar aiasynda jelilerdiń tozý kórsetkishin 15-20 paiyzǵa tómendetemiz. Tarif kóteriledi, basqa jol joq. Eń kúrdeli nysandardy qaraimyz. Olar jan-jaqty zertteledi. Oǵan bailanysty tiisti tarifti kóterý máselesi qaralady», - dedi Qýantyrov.
Onyń sózine qaraǵanda, atalǵan zertteýler aiasynda tarifterdiń kólemi naqtylanady.
«Mysaly, Ekibastuzda sýbekti tarifti 2,5 ese kóterýge usynys berdi. Árine, osyndai deńgeide kóterý múmkin emes. Sondyqtan ony áli de talqylaimyz», - dedi vedomstvo basshysy.
Bul turǵyda ministr tarif kóterý aiasynda turǵyndardyń jaǵdaiy nazarǵa alynatynyn, halyqqa eleýli aýyrtpalyq túsirmeý máselesi egjei-tegjeili qaralatynyn aitty.
Aita keteiik, búgin Senatta «Qazaqstan Respýblikasynyń keibir zańnamalyq aktilerine Memleket basshysynyń jekelegen tapsyrmalaryn iske asyrý máseleleri boiynsha ózgerister men tolyqtyrýlar engizý týraly» zań jobasy qaraldy.
Qujatta investitsiialardy ulǵaitý jáne kommýnaldyq jelilerdiń tozýyn azaitý úshin qajetti jumystardy júrgizý maqsatynda zańda bekitilgen tarifti onyń qoldanylý merzimi aiaqtalǵanǵa deiin ózgertý turǵysynda qosymsha negizdi kózdeitin túzetýler usynyldy.
Álibek Qýantyrov bul norma qabyldansa, kásiporyndar tarifti óz erkine qarai kótere almaitynyn túsindirdi.
«Bul rette tiisti shekteýler bolady. Ár sýbekt pen óńir boiynsha tarifterdi kóterý týraly usynystaryn egjei-tegjeili qaraimyz. Atap aitqanda, bizdiń vedomstvoda, odan keiin qoǵam talqylaýynda bolady», - dedi ministr.
