Kiim óndirisi 2020 jyldyń 11 aiynda aitarlyqtai tómendedi, dep habarlaidy "Ult aqparat" ENEGRYPROM.KZ portalyna silteme jasap.
Sviter, jempir, kardigan, jeletke jáne sol sekildi toqyma óndirisi jylyna 40,8%-ǵa, 90,5 myńǵa deiin qysqardy. Emizýli balalarǵa arnalǵan kiim 40,1%-ǵa, 14,6 mln teńgege azaidy. Mashinamen nemese qolmen toqylatyn syrt kiim óndirisi 39,4%-ǵa, 87,4 myńǵa, shulyq 25,2%-ǵa, 10,7 mln-ǵa deiin qysqarǵan.
Bas kiim men qalpaqqa suranys, kerisinshe, artqan. Ósim jylyna 54,1%-dy nemese 12 mlrd teńgeni quraidy.
Baǵasy boiynsha 2020 jyldyń 11 aiynda bir jyl burynǵymen salystyrǵanda 40,6 mlrd teńgege - 10,2%-ǵa kóbirek kiim óndirilgen. Al shynaiy ósim ótken jylmen salystyrǵanda – 3,7%.
Óńirler boiynsha Almaty oblysy, Shymkent jáne Almaty qalalary kósh bastap tur. Bul óńirlerde «Glasman» JShS, «Arlan 777» JShS, «TF Ajar» JShS, «Mediateks-N» JShS, «Texti Market» JShS, «Demeý-Arna» JShS, «Tehnoavia-Qazaqstan» JShS, «Kazlegprom-Almaty» JShS, «Araily» JShS, «Gaýhar» tigin fabrikasy, «Nýrdan» kompaniiasy, «Álem-BT» JShS syndy kompaniialar jumys isteidi.
Suranys (eksport pen ishki naryqtaǵy saýda) tolyǵymen importshylarǵa táýeldi. Onyń ishinde, 2020 jyldyń on aiynyń málimeti boiynsha ish kiim naryǵynyń 98,9%-y, emizýli balalarǵa arnalǵan kiimniń 99,7%-y, toqylǵan syrt kiimniń 99,5%-y, sviter, jempir syndy toqyma ónimderiniń 98,8%-y, shulyqtyń 95,5%-y jáne sporttyq kiimderdiń 73,2%-y importqa tiesili.
Qazaqstanǵa ákelgen jeńil ónerkásip ónimi eksporttan 30 ese asyp túsedi. Sheteldik óndirýshiler elimizge 1 195 mlrd dollar turatyn taýar jetkizgen. Al qazaqstandyq eksportshylar 41 mln dollardyń ǵana taýaryn satqan. Qazirgi ýaqytta Qazaqstandaǵy tigin mekemeleri memlekettik tapsyrys esebinen qyzmetin toqtatpai otyr. Onsyz da máz emes jaǵdaidy pandemiia tipti qiyndatyp jiberdi.
TMD elderinen elimizge 18,1 myń tonna kiim ákelingen. Olardyń arasyndaǵy negizgi importshylar Ózbekstan men Resei. Basqa elderden somasy 350,8 mln dollar turatyn 44,2 myń tonna kiim jetkizilgen. Álemniń basqa elderinen kelgen importtyń 85,1%-y Qytaiǵa tiesili.
2020 jyldyń qarashasynyń qorytyndysy boiynsha kiim men aiaq kiim baǵasy byltyrǵy jyldyń osy kezeńimen salystyrǵanda 5,2%-ǵa ósken. Ásirese Qyzylorda, Batys Qazaqstan jáne Soltústik Qazaqstan oblystarynda bul taýarlar aitarlyqtai qymbattaǵan. Syrt kiim jylyna 4,7%-ǵa, onyń ishinde erlerdiń kiimi 4,6%-ǵa, áielderdiki - 5%-ǵa jáne balalardyń syrt kiimi 4,2%-ǵa qymbattady.
