Qazaqstan Respýblikasynyń Parlamenti Májilisi men máslihat depýtattarynyń sailaýynda Aqmola oblysy boiynsha jumys istegen halyqaralyq baiqaýshylar óńirlik kommýnikatsiialar qyzmetinde jýrnalistermen brifing ótkizdi, dep habarlaidy "Ult aqparat".
Brifingke Qazaqstandaǵy Tatarstan Respýblikasynyń quzyretti ókili Denis Valeev, Tatarstan Respýblikasy Prezidentiniń Syrtqy bailanys departamenti direktorynyń orynbasary Marat Bektemirov, qoǵamdyq-saiasi jáne kommertsiialyq uiymdarmen bailanys boiynsha bólimniń bas keńesshisi Aleksandr Maratkanov qatysyp, baiqaýshy retindegi oi-pikirin bólisti.
Tatarstandyq baiqaýshylar Aqmola oblysynyń birqatar óńirinde bolyp, sailaýda halyqtyń belsendiligin baiqaǵan.
«Kókshetaý qalasy, jalpy, Aqmola oblysynda ótken sailaý oń áser qaldyrdy. Biz óńirdegi 10 sailaý ýchaskesinde boldyq. Sonda baiqanymyz - sanitarlyq shekteýler jáne demalys kúnine qaramastan daýys berýshiler óte belsendi boldy. Tipti, biz bolǵan sailaý ýchaskelerinde daýys berýshilerdiń legi bir tolastamady. Baiqaǵanymyzdai sizderde turǵyndar sailaýǵa asa úlken jaýapkershilikpen qaraidy eken. Adamdardyń kóńil-kúii kóterińki boldy», - dedi Denis Valeev.
Sonymen qatar, delegatsiia óńirde ótip jatqan Májilis pen máslihat depýtattarynyń sailaýy Qazaqstan Respýblikasynyń zańnamasyna, memleket qabyldaǵan halyqaralyq mindettemelerge sáikes bolǵanyn atap ótti.
«Májilis pen máslihat depýtattarynyń sailaýyna kúmán keltirerliktei ulttyq zańnamanyń buzylýy tirkelgen joq», - dedi Aleksandr Maratkanov.
Tatarstan Respýblikasy Prezidentiniń Syrtqy bailanys departamenti direktorynyń orynbasary Marat Bektemirovtiń pikiri de áriptesteriniki siiaqty bir jerden shyqty.
