Qazaqstanda aldaǵy jyly kezekten tys parlamenttik sailaý óte me? Bul suraqqa «Ashyq dialog» baǵdarlamasynda QR Aqparat jáne qoǵamdyq damý ministri Dáýren Abaev jaýap berdi, dep habarlaidy "Ult aqparat".
«Umytpasam, buǵan deiin de «kúzde parlamenttik sailaýdyń ótetini anyq» degen paiym-pikirler jeldei esken edi. Al qazir jyldyń jeltoqsany kep qoidy. «Nur Otan» partiiasynyń kez kelgen derlik belsendiligi – birden kezekten tys sailaýǵa daiyndyq sekildi qabyldanatyn bolypty. Biraq, bizdiń kórip otyrǵanymyz – bári qarapaiym protsess, partiianyń elektorataralyq jumysy ǵana. Onyń ústine partiianyń barlyq salasyn qaita jandandyrý mindetin qoidy. Sózsiz, aimaqtardy tartpasa, bul istiń sátti bolmasy anyq», - dedi ministr.
Dáýren Abaev Nursultan Nazarbaevtyń «Nur Otan» filialdary ókilderimen kezdesýinen ne túigenin aityp berdi.
«Álbette, aitylǵan eń mańyzdy máselelerdiń biri – máslihat depýtattarynyń partiialyq jaýapkershiligin kúsheitý. Búgingi kúni ózderińiz jaqsy biletindei, jergilikti basqarý isi jaqsy jetilip keledi. Aýdandar men aýyl ákimdikteriniń basym bóligi qazirgi ýaqytta ózdiginen biýdjetti túzip, jumsai alady. Iaǵni, olar qarajatty qaida jumsaýdy sheshedi. Bul rette aimaqtardy damytýdaǵy strategiialyq sheshimderdi qabyldaýda da máslihattardyń róli kúsheiedi. Osy rette sailaýaldy ýádelerdi oryndaýda partiianyń depýtattaryna erekshe jaýapkershilik júgi artylatyny anyq», - dedi Dáýren Abaev.
