Foto: Freepik
Ulttyq ekonomika ministriniń birinshi orynbasary Azamat Amrin Qazaqstanda jańa salyq kodeksine sáikes qai salalar qosylǵan qun salyǵynan bosatylatynyn aitty, dep habarlaidy Ult.kz.
Májiliste ótip jatqan dóńgelek ústelde eldegi salyq reformasyna qatysty jańa usynystar talqyǵa tústi.
"Biz qosylǵan qun salyǵy boiynsha differentsiialanǵan stavka usynyp otyrmyz. Jalpylama bekitilgen 16% – bazalyq stavka. Ekinshi nusqa – agroónerkásip keshenin qosylǵan qun salyǵynan bosatý. Buǵan qaramastan biz óz erkimen esepke turý quqyǵyn qaldyramyz. Sáikesinshe salyq tóleýshi QQS (qosylǵan qun salyǵy) tóleýshisi bola alady, mundai quqyq saqtalady. Sondai-aq aralyq 10% mólsherleme de bar. Jobaǵa sáikes bul stavka densaýlyq saqtaý salasyna, IT, kreativti indýstriia, týrizm salasyna usynylyp otyr", – dedi Amrin dóńgelek ústelde.
Onyń sózinshe, jumys toby aimaqtardy aralaý kezinde biznes jáne jurtshylyqtan túsken usynystardy talqyǵa salǵan. Onyń ishinde azyq-túlik pen ózge de taýar kategoriialaryna qatysty QQS tómendetý jaily usynys bolǵan.
Sondai-aq Salyq kodeksi jobasynda kelesi usynystar bar:
- QQS-ty 12-den 16% kótere otyryp, buqaralyq aqparat quraldary men agroónerkásip keshenin QQS-tan bosatý. Sonymen qatar farmindýstriia, meditsina qyzmetteri men áleýmettik mańyzy bar azyq-túlik úshin tómendetilgen 10% kóleminde mólsherleme belgileý;
- QQS tóleýshelilerdi tirkeý úshin eń tómengi shekti 20 000 AEK-ten 3 800 AEK-ke (2025 jyly 14 941 600 teńge) deiin tómendetý.
"Qazir bul suraq talqylanyp jatyr. Májilistegi salalyq toptyń jumysy aiasynda biz bul usynystardy egjei-tegjeili qarastyramyz", – dep qosty ol.
Ministrlik deregine sáikes biýdjet túsimderin kóbeitý arqyly jyl saiyn el qazynasy qosymsha 4-5 trillion teńgege tolyǵady.
