Búgin Májilistiń Halyqaralyq ister, qorǵanys jáne qaýipsizdik komiteti Mańǵystaý oblysy Aqtaý qalasynda kóshpeli otyrys ótkizdi, dep habarlaidy Tómengi Palatanyń baspasóz qyzmeti.
Shara barysynda Qazaqstan Respýblikasy Qarýly kúshteriniń, basqa da áskerleri men áskeri quralymdarynyń arsenaldarynda, bazalarynda, qoimalarynda saqtaýdaǵy qarý-jaraq pen oq-dárilerdiń qaýipsizdigin jáne saqtalýyn qamtamasyz etý, sondai-aq qarý-jaraq pen oq-dárilerdi saqtaý obektilerin kóshirý men jailastyrý baǵdarlamasyn iske asyrý máseleleri talqylandy.
Otyrysty ashqan beiindi komitet tóraǵasy Muhtar Erman atalǵan taqyrypta is-sharany ótkizý Arystaǵy qaiǵyly oqiǵany esepke ala otyryp, qoǵamǵa degen mańyzdylyǵyn atap ótti.
Issapar barysynda depýtattar Qorǵanys ministrliginiń, Ulttyq ulannyń, UQK Shekara qyzmetiniń bazalary men qoimalarynda qarý-jaraq, oq-dárilerdiń qaýipsizdigin jáne saqtalýyn qamtamasyz etý suraqtaryn zerttedi.
Atap aitqanda, depýtattar Aqtaý garnizony áskeri bólimderinde qarý jaraqtar, áskeri tehnikalardyń jáne múlikterdiń saqtalýymen jáne jumyldyrý qorynyń nysany bolyp tabylatyn arnaiy meditsinalyq qamtamasyz etý bazasymen tanysty. Sonymen qatar, qarý-jaraq pen oq-dárilerdi saqtaý obektilerin kóshirý men jailastyrý baǵdarlamasynyń aralyq qorytyndylary belgilendi.
Is-shara aiasynda Májilis depýtattary Irina Aronova men Qudaibergen Erjan «Nur Otan» partiiasy Mańǵystaý oblystyq filialynda azammatardy qabyldaý ótkizdi.
Kóshpeli otyrysty qorytyndylai kele, májilismender kóterilgen ózekti máselelerge qatysty usynystar men pikirler tiisti zańnamalardy jetildirýde eskeriletinin aitty.
Otyrys jumysyna Májilis depýtattary men Qorǵanys ministrligi, Ulttyq ulan, UQK Shekara qyzmeti, QR Ishki ister ministrliginiń tótenshe jaǵdailar komiteti, Bas áskeri prokýratýranyń jáne oblystyq ákimshiliktiń ókilderi qatysty.
