Foto: tengrinews.kz
Qazaqstannyń birneshe óńirinde kartop baǵasynyń kúrt ósýine bailanysty úkimet kókónisti úshinshi elderge eksporttaýdy jarty jylǵa shekteý týraly sheshim qabyldady, - dep habarlaidy Úkimettiń baspasóz qyzmeti.
Premer-ministrdiń tapsyrmasymen Aýyl sharýashylyǵy, Saýda jáne integratsiia ministrlikteri eldegi kartop naryǵynyń jaǵdaiyn turaqty baqylaýda ustap otyr.
"Kórshi elderden, ásirese Ózbekstannan suranystyń artýy jáne biylǵy joǵary eksporttyq baǵalar saldarynan kartop eksporty 1,5 esege ósti: 411 myń tonnadan 605 myń tonnaǵa deiin. Ajiotajdyq suranys ishki naryqqa áser etti. Sońǵy aptada eksportqa baǵdarlanǵan óndirýshilerdiń baǵa deńgeii 170 teńgeden 270 teńgege deiin kóterildi", – delingen úkimettiń habarlamasynda.
Ishki naryqtaǵy kartop baǵasyn turaqtandyrý úshin 18 qańtarda ótken Saýda qyzmeti máseleleri jónindegi vedomstvoaralyq komissiianyń otyrysynda kartopty úshinshi elderge shyǵarýdy 6 aiǵa shekteý týraly sheshim qabyldandy.
"Bul shekteý Eýraziialyq ekonomikalyq odaq elderine qoldanylmaidy, biraq eksportqa qatań baqylaý júrgiziledi. Sonymen qatar, 16 qańtardan bastap fitosanitarlyq sertifikattardy berý tolyǵymen toqtatyldy",-dep túsindirdi úkimet.
Úkimet qabyldaǵan sharalar kartop baǵasynyń turaqtylyǵyn qamtamasyz etýge, negizsiz baǵa ósimin boldyrmaýǵa jáne naryq qatysýshylarynyń alypsatarlyq áreketterin shekteýge baǵyttalǵan. Saýda jáne integratsiia ministrliginiń aýmaqtyq organdary antimonopoliialyq organdarmen birlese otyryp, jaǵdaidy kúsheitilgen baqylaýǵa alyp, zańbuzýshylyqtar anyqtalǵan jaǵdaida shara qoldanatynyn málimdedi.
Aýyl sharýashylyǵy ministrliginiń derekterine sáikes, búgingi kúngi kartop qory erte ónim shyqqanǵa deiingi ishki qajettilikti tolyq qamtamasyz etýge jetkilikti. 19 qańtardaǵy jaǵdai boiynsha saýda jelilerindegi qorlardy eseptemegende, jalpy qor 850 myń tonnadan asady.
2024 jyly elimizde 2,9 million tonna kartop jinaldy, onyń 300 myń tonnasy erte ónim. 2024 jylǵy import kólemi 56 myń tonnany qurady. 2024 jyldyń tamyz aiynan bastap ishki naryqqa jiberilgen kartop kólemi 2,6 million tonna bolsa, halyqtyń jalpy qajettiligi – 1,5 million tonna (onyń ishinde qalalyq tutyný – 954 myń tonna) erte ónim jinalǵanǵa deiin (qańtar-sáýir). 2024 jyldyń tamyz-jeltoqsan aralyǵynda tutynylǵan kólem – 844 myń tonna, eksport – 620 myń tonna (2024 jyldyń qańtar-jeltoqsan ailary aralyǵynda). 2025 jylǵa (qańtar-sáýir) boljanǵan tutyný kólemi – 675 myń tonna.
Qazaqstannyń túrli óńirlerinde kartoptyń bólshek baǵasy eki esege deiin ósti. Aqtóbede qańtar aiynyń basynda kartoptyń bir kelisi 200 teńgeden aspasa, sońǵy aptada 388 teńgege deiin kóterildi. Jetisý óńirinde baǵa 400 teńgeden asyp ketti, biraq sapasy joǵary. Astanada eń qymbat kartoptyń baǵasy – 455 teńge.
