QR Densaýlyq saqtaý ministri Aleksei Tsoi koronavirýs indetiniń jańa tolqyny elimizde úsh stsenarii boiynsha órbýi múmkin ekendigin aitty, dep habarlaidy "Ult aqparat".
«Boljamǵa sáikes, Qazaqstandaǵy epidemiia úsh stsenarii boiynsha damýy múmkin. Ol kúndelikti túzetilip otyrady. Atap aitqanda, pessimistik stsenariige sáikes, maska rejimi tek 60 paiyz qamtamasyz etilgende 2020 jyldyń qazan-jeltoqsanynda tirkelgen jaǵdailar sany shamamen 190 myń adamdy qurap, 65 myń adam aýrýhanaǵa jatqyzýdy qajet etetin bolady. Lokdaýn engizý jeltoqsan aiynyń ortasyna boljanady», - dedi ministr Aqordada Memleket basshysy Qasym-Jomart Toqaevtyń tóraǵalyǵymen ótken keńeste.
Onyń atap ótýinshe, ekinshi shynaiy stsenarii boiynsha áleýmettik araqashyqtyq sharalary qamtamasyz etilip, maska rejimi 70 paiyzǵa oryndalǵan jaǵdaida 2020 jyldyń qazan-jeltoqsanynda tirkelgen jaǵdailar sany shamamen 90 myń adamdy quraidy. Al aýrýhanaǵa jatqyzýdy qajet etetin naýqastar sany 30 myń adam bolady. Mundai jaǵdaida lokdaýn 2021 jyldyń qańtarynda engizilýi múmkin.
«Araqashyqtyq erejesi saqtalyp, maska rejimi 100 paiyz qamtamasyz etilgen jaǵdaida bizge eń joǵary tósek-oryn qory deńgeiiniń 70 paiyzyna jetken kezdegi is-áreket qoldanylatyn qatań karantinge júginý qajet bolmaidy. Osy optimistik stsenarii kezinde, 2020 jyldyń qazan-jeltoqsanynda tirkelgen jaǵdailar sany shamamen 40 myń adamdy qurap, 15 myń adam aýrýhanaǵa jatqyzýdy qajet etedi», - dedi Aleksei Tsoi.
