Qazaqstanda shamamen 90 myń tonna qant qory bar jáne respýblika qantpen tolyq qamtamasyz etilgen. Bul týraly QR Aýyl sharýashylyǵy vitse-ministri Jeńis Óserbai aityp berdi, dep habarlaidy QazAqparat.
«Búgingi tańda respýblika boiynsha qant qory - shamamen 90 myń tonna. Saýda núktelerinde, turaqtandyrý qorlarynda, «Azyq-túlik kelisim shart korporatsiiasy» AQ saqtaý obektilerinde jáne memlekettik materialdyq rezervte shamamen 42 myń tonna, qant zaýyttarynda – shamamen 47 myń tonna bar», - dedi spiker ortalyq kommýnikatsiialar qyzmetinde ótken baspasóz máslihatynda.
Onyń aitýynsha, zaýyttar respýblikanyń ai saiynǵy tutynýyn (shamamen 44 myń tonna) eskere otyryp, shamamen 50 myń tonna óndire alady, iaǵni zaýyttar respýblikanyń qantqa degen qajettiligin tolyq qamtamasyz etedi.
«Azyq-túlik korporatsiiasy» AQ qazirgi ýaqytta ótinimder boiynsha qant qabyldaýdy jáne óńirlerge satýdy júrgizedi. Qazaqstan konditerleri qaýymdastyǵynyń derekteri boiynsha, konditerlik fabrikalar da taiaý ýaqytta qanttyń qajetti kólemimen qamtamasyz etilgen.
«EEK Keńesiniń sheshimimen Qazaqstan Respýblikasyna aq qant pen quraq shiki qantyn 250 myń tonna kóleminde bajsyz ákelý quqyǵy berildi. Qantty ákelýge arnalǵan kvotalardyń qorlary men kólemin eskersek, respýblika qantpen tolyq qamtamasyz etilgen», - dedi Jeńis Óserbai.
Buǵan deiin Jeńis Óserbai eldegi áleýmettik mańyzy bar azyq-túlik qory týraly aityp bergen edi.
Ákimdikterdiń jedel derekterine sáikes, 12 naýryzdaǵy jaǵdai boiynsha respýblikada barlyǵy 1,3 mln tonna áleýmettik mańyzy bar azyq-túlik bar, onyń ishinde un – 144 myń tonna, qant – 90 myń tonna, kúrish – 39,3 myń tonna, makaron – 21 myń tonna jáne shamamen 900 myń tonna kókónis ónimderi jáne basqalary bar.
