Jyl basynan beri qazaqstandyqtarǵa 2,4 trln teńgeden astam zeinetaqy tólendi, dep habarlaidy QazAqparat.
«2021 jyldyń qańtar-qarasha ailarynda respýblikalyq biýdjetten bazalyq zeinetaqy tóleýge 750,8 mlrd teńge, yntymaqty zeinetaqy tólemderine – 1 trln 696,4 mlrd teńge baǵyttaldy. 2021 jylǵy qarashada respýblikalyq biýdjetten zeinetaqy tólemderine 221,2 mlrd teńgeden astam, onyń ishinde bazalyq zeinetaqyny tóleýge – 68 mlrd teńge, yntymaqty zeinetaqyny tóleýge – 153,2 mlrd teńge igerildi», - delingen Eńbek jáne halyqty áleýmettik qorǵaý ministrligi málimetinde.
2021 jylǵy 1 jeltoqsandaǵy jaǵdai boiynsha zeinetkerler sany 2 mln 233 myń adamdy qurady.
«Zeinetaqy tólemderiniń ortasha mólsheri (onyń ishinde bazalyq zeinetaqy) 2021 jylǵy 1 jeltoqsandaǵy jaǵdai boiynsha 99 726 teńgeni qurady», - dep atalyp ótken vedomstvo aqparatynda.
Eske salaiyq, 2018 jylǵy 1 shildeden bastap memlekettik bazalyq zeinetaqy tólemi, zeinetaqy júiesindegi tájiribesin eskere otyryp, ár alýshyǵa jeke taǵaiyndalady.
Bul rette 1998 jylǵy 1 qańtardaǵy jaǵdai boiynsha yntymaqty júiede jumys istegen ýaqyty, sondai-aq mindetti zeinetaqy jarnalary tólengen kezeńder (MZJ) zeinetaqy júiesindegi eńbek ótiline qosylady.
Sonymen, eger zeinetaqy júiesindegi jumys ótili 10 jyl nemese odan az bolsa, sondai-aq eger múlde joq bolsa, bazalyq zeinetaqy eń tómengi kúnkóris deńgeiiniń 54%-yn quraidy, sodan keiin 10 jyldan asqan ár jyl úshin onyń mólsheri 2%-ǵa artady. Mysaly, eger siz 20 jyl qatyssańyz, bazalyq zeinetaqy kúnkóris deńgeii qunynyń 74%-dy, 30 jyl – kúnkóris qunynyń 94%-yn quraidy. 33 jáne odan da kóp jyl jumys ótili bolsa, kúnkóris qunynyń 100% joǵary mólsherinde belgilenedi.
Eger bir ai ishinde MZJ Biryńǵai jinaqtaýshy zeinetaqy qoryna birneshe ret jasalsa, jinaqtaýshy júiege qatysý merzimi bir aidy quraidy.
Osylaisha, mindetti zeinetaqy jarnalary neǵurlym turaqty jáne tolyq salynatyn bolsa, zeinetaqy jasyna jetkende bazalyq zeinetaqy tólemderiniń mólsheri soǵurlym kóp bolady.
Óz kezeginde, jasyna bailanysty zeinetaqy tólemderiniń mólsheri 1998 jylǵy 1 qańtardaǵy jumys ótiline (kem degende 6 ai qajet) jáne zeinetkerlikke deiingi kezeńde alynǵan ortasha ailyq tabysqa bailanysty bolady.
