Germaniiada 1 mln-ǵa jýyq qazaqstandyq turyp jatsa, Qazaqstanda 200 myńǵa jýyq nemis turady. Bul týraly QR Syrtqy ister ministriniń orynbasary Roman Vasilenko málim etti, dep habarlaidy QazAqparat tilshisi.
«Qazaqstan men Germaniia qarym-qatynasy saiasi belsendi bailanys jáne saýda-investitsiialyq jobalar arqyly myǵym. Sondai-aq adami ólshemniń mańyzdy áleýetimen de erekshelenedi. Elimiz HH ǵasyrdyń basynda ólkemizge kele bastaǵan myńdaǵan nemis úshin ekinshi otanyna ainaldy. Al Edil boiyndaǵy nemisterdi qaiǵyly stalindik deportatsiialaǵannan keiin elimizdegi nemisterdiń sany 1 millionǵa deiin ósti. Biz árqashan Qazaqstannyń birtutas halqynyń ajyramas bóligine ainalǵan nemis otandastarymyzdyń eńbeksúigishtigi men tatý kórshiligine zor qurmetpen qaraimyz. Búginde Germaniiada 1 mln-ǵa jýyq qazaqstandyq turyp jatyr. Onyń ishinde bizdiń elde turyp, keiin tarihi otanyna kóshkender de bar. Al bizge kelsek, Qazaqstanda 200 myńǵa jýyq nemis halqy ómir súrip jatyr», - dedi R. Vasilenko.
Vitse-ministrdiń málimdeýinshe, ishki ekonomikany ilgeriletýde Germaniia óz úlgisimen erekshelenedi.
«Ótken jyldyń qyrkúiek aiynda Nur-Sultanda qazaq-german ortalyǵy ashyldy. Ondaǵy maqsat - Qazaqstandaǵy nemis etnosyn shoǵyrlandyrý jáne jan-jaqty qoldaý. Sondai-aq Qazaqstan men GFR arasyndaǵy mádeni-gýmanitarlyq yntymaqtastyqty odan ári damyta túsý. Qorytyndylai kele, senim men ózara túsinistikke negizdelgen jemisti yntymaqtastyq úshin nemis dostarymyzǵa, áriptesterimizge jáne seriktesterimizge rizashylyǵymdy bildiremin. Jáne diplomatiialyq qarym-qatynastyń 30 jyldyǵymen taǵy da quttyqtaimyn!», - dedi ol.
