QR Premer-Ministriniń orynbasary Roman Skliar elimizde kómýge tyiym salynǵan qaldyqtardy atady, dep habarlaidy QazAqparat.
«Ekologiia kodeksiniń 365-babyna sáikes, jergilikti atqarýshy organdar turmystyq qatty qaldyqtardy jinaý, tasymaldaý, suryptaý, qalpyna keltirý jáne joiý qyzmetterin júzege asyratyn kásipkerlik sýbektileri úshin qajetti infraqurylymdy ázirlep, onyń jumys isteýin qamtamasyz etedi. Paligondarǵa jetkiziletin qaldyqtardy qysqartý, sapaly qaitalama shikizat alý úshin 2016 jyldan beri qaldyqtardyń birqatar túrin, onyń ishinde qurylys qaldyqtaryn kómýge tyiym kezeń-kezeńimen engizildi», - delingen Roman Skliardyń Májilis depýtattary saýalyna bergen jaýabynda.
Onyń atap ótýinshe, 2016 jyldan bastap quramynda synap bar shamdar men quraldardy, metall qaldyqtaryn, kádege jaratylǵan mai men suiyqtyqtardy, batareialardy, elektrondy qaldyqtardy poligondarda kómýge tyiym salynǵan. Al 2019 jyldan beri plastmassa, makýlatýra, karton jáne qaǵaz qaldyqtaryn, shynylardy, 2021 jyldyń 1 qańtarynan qurylys jáne tamaq qaldyqtaryn kómýge bolmaidy.
«Qaldyqtardy basqaratyn uiymdardyń qyzmetin retke keltirý jáne baqylaý úshin Kodekste habarlandyrý tártibin engizý kózdelgen. Sonymen qatar jańadan zańsyz qoqys alańdarynyń paida bolýyna jol bermeý maqsatynda qoqys shyǵaratyn uiymdar kólikterine GPS quralyn ornatýǵa jáne kólikterdiń qozǵalysy týraly tolyq aqparatty berip otyrýǵa mindetti», - dedi Úkimet basshysynyń orynbasary.
