2020 jyly Dárilik zattar men meditsinalyq buiymdardy saraptaý ulttyq ortalyǵyna dárilik zatty saraptamadan ótkizý boiynsha 7 176 ótinim tústi, dep habarlaidy "Ult aqparat" ortalyqtyń baspasóz qyzmetine silteme jasap.
Sarapatamaǵa berilgen preparattyń 998-y qazaqstandyq óndirýshiden berilgen.
«Ótinimder tirkeý, qaita tirkeý jáne tirkeý qujattamasyna ózgerister engizý boiynsha tústi. Kelip túsken preparattardyń barlyǵy birdei eksperttik uiymnyń oń qorytyndysyn almaýy múmkin. Teris qorytyndy birneshe jaǵdaida beriledi. Kóbine, ótinim berýshi qate málimet berse, sapa men qaýipsizdik kórsetkishteri talap etilgennen tómen bolsa, dári quramynda Qazaqstanda tyiym salynǵan zattar tabylsa, óndiris sharttary belgilengen talaptarǵa sáikes kelmese, dárilik zatty paidalaný kezinde onyń paidasy baiqalmasa», delingen habarlamada.
Búginde Qazaqstanda Dárilik zattar memlekettik reestrinde 7 305 preparat tirkelgen. Onyń 931-i otandyq ónim. Atap aitarlyǵy, elde tirkelgen dári-dármek sany kúnnen-kúnge artyp keledi.
Bir jaǵynan, saraptamadan ótip, elde qoldanýǵa ruqsat berilgen jańa preparattar qosylsa, ekinshi jaǵynan, zertteý nátijesinde alynǵan nemese dárigerlerdiń habarlamasyna negizdelgen jańa qaýipsizdik týraly aqparat boiynsha dári-dármekter naryqtan alynyp tastalady. Óndirýshi de tehnikalyq, marketing nemese basqa da sebeptermen óz erkimen tirkeýdi toqtatýy múmkin.
«Dárilik zattar men meditsinalyq buiymdardy saraptaý ulttyq ortalyǵy dárilik zattar tirkelgenge deiin de, keiin de eksperttik jumystar júrgize beredi. Dárilik zattardyń sapasyn baqylaý júiesi olardyń qoldanysta júrgen barlyq kezeńderin qamtidy. Preparattardy memlekettik tirkeýden buryn olardyń tiimdiligi, qaýipsizdigi men sapasyna keshendi baǵalaý júrgiziledi, sonyń nátijesinde dári-dármek naryqqa shyǵarylady. Tirkeý tiisti tirkeý kýáligimen rastalady», delingen habarlamada
Barlyq tirkelgen dári-dármektermen ortalyqtyń saitynda ashyq ornalastyrylǵan Memlekettik reestrde tanysýǵa bolady. Munda dárilik zattar týraly tolyq aqparat, onyń ishinde ataýy, óndirýshisi, tirkelgen kúni, shyǵarylǵan túri, dozasy, qoldaný nusqaýlyǵy, sondai-aq retsept boiynsha nemese onsyz bosatý týraly málimetter bar. Budan basqa, tirkelgen dáriler týraly tolyq aqparatpen Darikz mobildi qosymshasynda da tanysýǵa bolady.
«Qazaqstanda tirkelmegen preparattardy satýǵa tyiym salynǵanyn esten shyǵarmaý kerek. Sondyqtan dári-dármekti litsenziiasy bar dárihanalardan satyp alý qajet. Jeke tulǵalar men bazardan jáne basqa da satý pýnkterinen dári almaǵan jón. Dárini satyp alý kezinde satyp alýshy preparattyń sapasyn dáleldeitin qujattar suraýǵa quqyly», delingen habarlamada.
