Búgin Ortalyq kommýnikatsiialar qyzmetinde Qazaqstannyń ýrbanister qaýymdastyǵy keńesiniń tóraǵasy Erlan Áýkenov elimizdegi qalalardaǵy keńistikterdi josparlaýda oryn alǵan negizgi kemshilikterdi atady, dep habarlaidy QazAqparat.
«Qazirgi kezde ózekti máselelerdiń biri - kóshe keńistikteriniń pysyqtalmai josparlanýy. Qazaqstandaǵy kósheler men joldar kólikterdi ótkizý múmkindigine qarai baǵdarlanǵan. Sonymen birge, barsha álemde trend turǵyndardyń mobildigin arttyrýǵa qarai júrip barady. Bul turǵyda qoǵamdyq kólikti damytýǵa ekpin qoiylyp, jyldamdyq rejimin qysqartý eskerilgen», - dedi Áýkenov «Qalalyq keńistikti qalyptastyrýdyń jańa tásilderi týraly» atty dóńgelek ústel otyrysynda.
Budan bólek ol qala aýmaǵyn jaryqtandyrý máselesine toqtala kele, kóp jerlerde elektr jaryǵy tartylmaǵynyn, bul óz kezeginde qaýipsizdik máselesine áser etetinin jetkizdi.
Budan bólek Áýkenov qala keńistigin kógaldandyrý baǵyty da jetkilikti deńgeide pysyqtalmaǵanyn aitty.
«Kógaldandyrýdyń iri aýmaqtary keibir jaǵdaida fýnktsionaldy bolmai jatady jáne tek ásemdik fýnktsiiasyna arnalǵan. Sonymen birge, ǵylymi baǵdarǵa toqtalsaq, álemde qalypty ósimdikter jiyntyǵynan qalalardy ondaǵan jyldarǵa kógaldandyrý strategiiasyna aýysý júrip jatyr. Osy oraida ár qala úshin jekelei jasyl qordy irikteý, bir jyldyq ósimdikterdi kóp jyldyq ósimdikterge almastyrý eskerilgen. Qalalyq saiabaqtar da ózderiniń negizgi fýnktsiiasyn joǵaltyp bara jatyr, iaǵni tabiǵattyń bir bóligi bolýy sekildi negizgi máninen alystap barady», - dedi Erlan Áýkenov.
