Qazaqstan Parijde ótetin Junior Eurovision án baiqaýyna qatysatyn talantty balalardy izdep jatyr, dep habarlaidy QazAqparat.
Baiqaýǵa 9-14 jas aralyǵyndaǵy balalar qatysa alady. Ulttyq irikteý 4 kezeńnen turady.
«Dál qazir jevision.khabar.kz saitynda onlain ótinim qabyldaý bastalady. Ótinimder 29 qyrkúiekten 6 qazanǵa deiin qabyldanady. Qatysýshylar saýalnamany toltyryp, ózi oryndaǵan ánniń beinejazbasyn júkteýi kerek. Munda kópjyldyq tájiribe men avtorlyq ánniń bolýy mindetti emes. Eń bastysy – jaqsy án shyrqaý jáne ǵajaiypqa sený. Bul – irikteýdiń birinshi kezeńi», - dedi «Adam Media» kompaniiasynyń bas prodiýseri Aida Tileýhan ortalyq kommýnikatsiialar qyzmetinde ótken baspasóz máslihatynda.
Onlain ótinimnen keiin 7 qazan kúni qazylar alqasy barlyq ótinim arasynan 30 úmitkerdi anyqtaidy.
Tańdaýly 30 úmitker tizimi 8-12 qazan kúnderi «Habar» saitynda jariialanady.
«Úshinshi kezeńde – jevision.khabar.kz saityndaǵy onlain daýys berý satysy bastalady. Iaǵni kórermen 30 úmitker arasynan ulttyq irikteýdiń finalyna ótetin 10 kandidatty anyqtaidy. 12 qazan kúni saǵat 21:30-da «Habar» arnasynyń tikelei efirinde ulttyq irikteýdiń finalyna ótken 12 úmitker belgili bolady», - dep túsindirdi A. Tileýhan.
Tórtinshi kezeńde – 6 qarasha kúni «Habar» arnasynyń tikelei efirinde ulttyq irikteýdiń finaly ótedi jáne Qazaqstannyń namysyn qorǵaityn úmitker anyqtalady.
Munda elimizdiń eń tanymal kompozitorlary qatysýshylarǵa arnaiy án jazady.
Ádil qazy alqasynyń baǵasy men SMS daýys berý nátijesinde jeńimpaz anyqtalady.
Eń kóp upai jinaǵan finalist Parijde ótetin «Junior Eurovision Song Contest» halyqaralyq án baiqaýyna Qazaqstan atynan qatysady.
Aita keteiik, biylǵy 19-shy Junior Eurovision Song Contest balalar án baiqaýyna 19 el qatysady.
Olar: Albaniia, Armeniia, Ázirbaijan, Bolgariia, Frantsiia, Grýziia, Germaniia, Irlandiia, Italiia, Qazaqstan, Malta, Niderlandy, Soltústik Makedoniia, Polsha, Portýgaliia, Resei, Serbiia, Ispaniia jáne Ýkraina.
Qazaqstan saiysqa alǵash ret 2018 jyly qatysty. Ol kezde baiqaýǵa Daneliia Tóleshova «Ózińe sen» ánimen qatysyp, altynshy orynǵa ie boldy.
2019 jyly Erjan Maksim «Armanyńnan qalma» ánimen ekinshi oryn aldy.
2020 jyly pandemiia saldarynan balalar Evrovideniesi onlain-formatta ótti. Ótken jyldyń grand finalynda «Forever» ánin oryndaǵan Qaraqat Bashanova on úsh qatysýshynyń ishinde ekinshi orynǵa ie boldy.
