Vedomstvoaralyq komissiia iri jáne usaq maldy, kartop pen sábizdi eksporttaýǵa tyiym salý týraly sheshimdi maquldady, dep habarlaidy QazAqparat.
25 qarashada syrtqy saýda saiasaty jáne halyqaralyq ekonomikalyq uiymdarǵa qatysý máseleleri jónindegi vedomstvoaralyq komissiianyń otyrysy ótip, onda mal, kartop jáne kókónisti eksporttaýǵa tyiym salý máselesi qaraldy.
Nátijesinde vedomstvoaralyq komissiia barlyq jas toptaryndaǵy iri qara maldy 6 aiǵa, sondai-aq kartop pen sábizdi 3 ai merzimge Qazaqstan Respýblikasynyń aýmaǵynan shyǵarýǵa tolyq tyiym salýdy engizýdi maquldaý týraly sheshim qabyldady.
Qazirgi ýaqytta ishki naryqta iri qara jáne usaq mal etine baǵanyń ósýi baiqalady.
Qarasha aiynda respýblika boiynsha siyr etiniń baǵasy bir kilogramm úshin orta eseppen 2 239 teńgeni qurady.
Jyl basynan beri baǵa 15% - ǵa nemese 292 teńgege ósti.
Qoi etiniń ortasha baǵasy 21% - ǵa (419 teńge) ósip, bir kelisi úshin 2 409 teńgeni qurady.
Bul rette et óńdeý kásiporyndarynyń júktemesi 50% tómen deńgeide qalyp otyr.
Biylǵy jyldyń 10 aiynda 173 myń tonna et óńdelgen, bul et óndirisiniń jalpy kóleminiń nebári 18% - yn quraidy.
Sonymen birge buqashyqtar men qoshqarlar eksportynyń ulǵaiǵany baiqalady. Aǵymdaǵy jyldyń 10 aiynda 161 myń bas iri qara mal shyǵaryldy nemese 2020 jyldyń deńgeiinen 5,6 ese artyq, usaq mal shyǵarý 6,7 ese ulǵaidy jáne 112 myń basty qurady.
Osy jyldyń sońyna deiin 200 myńǵa jýyq iri qara mal shyǵarylýy múmkin.
Qalyptasqan jaǵdai et jáne et ónimderi baǵasynyń ósýine sebep bolýy múmkin.
Aǵymdaǵy jyly kartop pen sábizden jinalǵan ónim ishki tutyný jáne eksporttyq áleýetti saqtaý úshin jetkilikti ekenin atap ótken jón.
Alaida, kórshi elderde kókónis ónimderi men kartoptyń tómen ónimdiligi bar ekenin atap ótken jón, bul ishki naryqtaǵy baǵalardyń ósýine ákelýi múmkin.
Osy obektivti kórsetkishterge súiene otyryp, ishki naryqtaǵy tapshylyqty boldyrmaý jáne baǵany turaqtandyrý úshin vedomstvoaralyq komissiia iri jáne usaq maldy, kartop pen sábizdi Qazaqstannyń aýmaǵynan áketýge tyiym salýdy maquldaý týraly sheshim qabyldady.
Bul rette, syrtqy eksporttyq ótkizý naryqtaryn saqtaýdyń mańyzdylyǵyn eskere otyryp, shekteýler jeltoqsan aiynyń sońynda kúshine enetinin nazarǵa ala otyryp, ministrlik bir ai ishinde aǵymdaǵy jaǵdaiǵa kúndelikti monitoring pen taldaýdy júzege asyratyn bolady.
Sondai-aq osy másele boiynsha salalyq qaýymdastyqtarmen jáne odaqtarmen talqylaý jáne konsýltatsiialar túrinde birlesken jumys júrgiziledi.
Ishki naryqty qamtamasyz etý boiynsha jaǵdai turaqtalǵan jaǵdaida shekteý sharalarynyń kúshin joiý máselesi de qaralatyn bolady.
