Qazaqstanda internet alaiaqtyǵymen bailanysty qylmystar sany artqan. Bul týraly QR Ishki ister ministrligi Kriminaldyq politsiia departamenti bastyǵynyń orynbasary Qanat Nurmaǵambetov aitty, dep habarlaidy QazAqparat.
«Sońǵy jyldary búkil álemde jáne Qazaqstanda internet jelisi arqyly jasalatyn qylmystardyń, onyń ishinde internet-alaiaqtyqtyń sany artty. Jyl basynan beri úsh aida ishki ister organdary osyndai 6 myńnan astam qylmysty tirkedi», - dedi spiker QR IIM aptalyq brifinginde.
Máselen, Instagram jelisinde áielder kiimin satý týraly jalǵan habarlandyrý jariialaǵan Jambyl oblysynyń turǵyny ustaldy. Qazirgi ýaqytta atalǵan fakti boiynsha 40 jábirlenýshi anyqtalǵan jáne tergeý jalǵasýda.
«Qaraǵandy oblysynda da ustalǵan azamatqa qatysty qylmystyq isti tergeý barysynda internette avtobólshekter satý boiynsha jalǵan habarlandyrý arqyly qosymsha 23 alaiaqtyq jasaǵany anyqtaldy. Al Soltústik Qazaqstan oblysynda azamattardyń qujattarynyń kóshirmelerin paidalana otyryp, onlain nesieler rásimdeý jolymen 50 urlyq jasaǵan alaiaq ustaldy», - dedi Q. Nurmaǵambetov.
Ministrliktiń habarlaýynsha, jyl basynan beri kiberqylmystarǵa qarsy is-qimyl baǵdarlamasy júrip jatyr. Onyń aiasynda memlekettik organdarmen, qarjy mekemelerimen, uialy bailanys operatorlarymen, qyzmet provaiderlerimen jáne onlain platformalarmen ózara aldyn alý sharalary jasalady.
Sonymen birge, toqsan saiyn respýblika aýmaǵynda kiberqylmystardyń aldyn alýǵa jáne ashýǵa baǵyttalǵan jedel-aldyn alý sharalary («Anti-fraud», «Hi-tech») júrgiziledi.
