Qazaqstanda infliatsiia taǵy ósedi dep boljanyp otyr. Bul týraly Ulttyq bank tóraǵasynyń orynbasary Vitalii Týtýshkin Parlamentte respýblikalyq biýdjetti talqylaý kezinde aitty, dep habarlaidy QazAqparat.
«Proinfliatsiialyq táýekelderdiń kúsheiýin eskersek, Qazaqstannyń infliatsiia boljamy ósý jaǵyna qarai qaita qaralýda. Biyl naýryzda Qazaqstanda infliatsiia 12%-ǵa deiin jedeldep, 2016 jylǵy qyrkúiekten bastap eń joǵary mánge jetti», - dedi Týtýshkin Májilistiń jalpy otyrysynda.
Onyń aitýynsha, azyq-túlik taýarlary infliatsiiaǵa eń kóp úles qosqan, mundaǵy baǵa ósimi 15,4%-ǵa deiin jedeldegen.
«Naýryzda biz áleýmettik mańyzy bar azyq-túlik taýarlarynyń birden qymbattap ketkenin baiqadyq, bul Reseiden importtaýǵa tyiym salý aiasynda birqatar azyq-túlik taýarlarynyń defitsitine bailanysty oryn aldy. Sonyń áserinen naýryzdyń ekinshi aptasynda azyq-túlik taýarlary baǵasy 5,6%-ǵa ósti. Osydan keiin áleýmettik mańyzy bar azyq-túlik taýarlary baǵasynyń apta ishindegi ósimi naýryzdyń sońǵy aptasynda 1,3%, sáýirdiń birinshi jáne ekinshi aptasynda qatarynan 0,9% bolyp, birtindep turaqtana bastady», - dedi Ulttyq bank ókili.
