Qazaqstan Respýblikasyna jinalatyn importtyq keden bajdary burynǵydai AQSh dollarymen bólinedi jáne esepke alynady. Bul týraly Úkimettiń baspasóz qyzmeti habarlady.
Eýraziialyq ekonomikalyq odaq týraly shartta múshe memleketterdiń bir-biriniń biýdjetine importtyq kedendik bajdardy jinaý jáne ózara aýdarý boiynsha mindettemeleri kózdelgen.
Bul tetik árbir memlekette birkelki jáne mynadai negizgi kezeńderdi qamtidy: úshinshi elderden kelip túsetin taýarlardan ulttyq valiýtalarda importtyq bajdardyń somalaryn jinaý; importtyq bajdardyń kelip túsken somalaryn belgilengen koeffitsientterge sáikes bólý, ony AQSh dollaryna aiyrbastaý jáne olardy keiinnen EAEO-ǵa múshe memleketterge jiberý.
Resei Federatsiiasyna salynǵan sanktsiialarǵa bailanysty múshe memleketterdiń kedendik ákelý bajdaryn Resei Federatsiiasy men Belarýske dollarmen aýdarýy múmkin emes.
Kelissóz qorytyndysy boiynsha qazaqstandyq nusqa qoldaý tapty: Resei Federatsiiasyna jáne Belarýs Respýblikasyna kedendik ákelý bajdaryn esepke alý jáne bólý úshin Ulttyq jóneltýshi bankterdiń baǵamy boiynsha Resei rýbli paidalanylatyn bolady.
Qazaqstan Respýblikasyna, sondai-aq Armeniia Respýblikasyna jáne Qyrǵyz Respýblikasyna jinalatyn importtyq kedendik bajdar burynǵydai, AQSh dollarymen bólinedi jáne esepke alynady.
