Parlament Senatynyń depýtattaryn ǵylym máseleleri jónindegi zań jobasy birinshi oqylymda maquldandy, dep habarlaidy QazAqparat.
«Búgingi tańda óndiristiń innovatsiialyq damýynyń jáne ekonomikanyń básekege qabilettiliginiń ósýiniń zor faktory retinde ǵylymnyń rólin túsingen jón. Senatta indýstriialyq-innovatsiialyq negizde óndiristi ártaraptandyrý mindetterin jobalaýda ǵylym men ǵylymi-zertteý jáne tájiribelik-konstrýktorlyq jumystardyń damýyna bailanysty qandai da bir dárejede zań jobalary birneshe ret qaraldy. Bul rette ǵylym men óndiristi integratsiialaýdyń negizgi quraly retinde ulttyq innovatsiialyq júieni (UIJ) tolyqqandy qalyptastyrýdyń kúrdeli máseleleri kóterildi», - dedi zań jobasyn oqyǵan senator Edil Mamytbekov.
Onyń aitýynsha zań jobasy arqyly ǵylymi-zertteý institýttary, joǵary oqý oryndary, innovatsiialyq qorlar, injenerlik zerthanalar, tehnoparkter, kommertsiialandyrý keńseleri men basqa da qurylymdar arasyndaǵy damý teńgerimsizdigin joiý kózdelgen. Budan basqa, ǵylymnyń akademiialyq, joǵary oqý oryndary men salalyq tarmaqtaryn tiisti úilestirýdi jolǵa qoiý bóliginde túzetýler engiziledi. Bul qarjylandyrýdan bastap ǵylymi zertteýlerdiń nátijelerin óndiriske engizýge deiingi protseske tolyqqandy monitoring júrgizýge múmkindik beredi.
