Qazaqstanda ǵaryshqa ushý modelderin zertteý jáne ǵylymi synaqtar júrgizetin eksperimenttik qurlyq keshenin qurý josparlanǵan. Bul týraly Tashkentte ótken «Space Technology Sonference Central Eurasia» konferentsiiasynda «Qazaqstan ǵarysh sapary» UK« AQ basqarma tóraǵasy Aidyn Aiymbetov aitty, dep habarlaidy QazAqparat.
«Ǵarysh salasy – elimiz úshin ǵylym men tehnikanyń tyń baǵyty, ǵaryshtyq tehnologiialar, geofizika, meditsina jáne biologiia, biotehnologiialar jáne irgeli ǵylymdar salasyndaǵy ǵylymi synaqtar ǵarysh jetistikterin kez kelgen qyzmet salasyna endirýge múmkindik beredi», - dedi Aidyn Aiymbetov.
«Qazaqstan ǵarysh sapary» kompaniiasynyń málimetinshe, eksperimenttik qurlyq kesheni ǵarysh stansasynyń bir bóligi túrinde turǵyzylyp, onda zertteýshiler uzaq merzimdi synaqtar júrgizedi. Modýldiń jumysqa jaramdylyǵyna jergilikti tirshilikti qamtamasyz etý júieleri jaýap beredi. Keshen ǵaryshtaǵy jaǵdaiǵa barynsha jaqyndatylady. Zertteý qatysýshylary sol ortada jumys isteitin bolady.
Keshenniń negizgi mindetterine ǵarysh qyzmetiniń tynys-tirshiligin qamtamasyz etý júielerin, meditsinalyq profilaktika quraldaryn, ekipajdyń jumysqa qabilettiligi men sergektigin, ekipajdyń derbestigin, oqshaýlaný saldaryn jáne onymen bailanysty fiziologiialyq stressorlardy zerdeleý kiredi.
«Ortalyq Aziiadaǵy alǵashqy ǵaryshtyq zertteý modýli kóptegen entýziast jandardyń armanyn júzege asyrýǵa múmkindik beredi. Ǵaryshqa ushý baqyty búkil álemde ondaǵan adamdarǵa ǵana buiyrýy múmkin. Al qazaqstandyq eksperimenttik keshen bolashaqta júzdegen ǵalymdar men myńdaǵan týristi qabyldaityn bolady», - dedi jobanyń seriktesi Eurasian Space Ventures jeke ǵarysh kompaniiasynyń negizin qalaýshy Shýhrat Ibragimov.
«Qazaqstan ǵarysh sapary» kompaniiasynyń aqparatyna súiensek, eksperimenttik qurlyq kesheniniń syrtqy jáne ishki túri qazirgi ýaqytta qarqyndy pysyqtalyp jatyr jáne biyl tanystyrylatyn bolady.
