Parlament Senatynyń jalpy otyrysynda «Qazaqstan Respýblikasynyń keibir zańnamalyq aktilerine ǵylym máseleleri boiynsha ózgerister men tolyqtyrýlar engizý týraly» Zańy ekinshi oqylymda qaralyp, qabyldandy, dep habarlaidy QazAqparat tilshisi.
Qujat ǵylymi, ǵylymi-tehnikalyq saladaǵy zańnamany jetildirýge jáne onyń nátijelerin kommertsiialandyrýdy ońtailandyrýǵa baǵyttalǵan.
«Zań jobasyn barlyq deńgeide tolyq qaraý – engizilgen quqyqtyq erejeler men normalardyń negizdiligin, búgingi kúnniń qajettiligine jaýap beretindigin kórsetti. Atap aitqanda, Biýdjet kodeksinde ǵylymi, ǵylymi-tehnikalyq qyzmet nátijelerin kommertsiialandyrý boiynsha biýdjet baǵyttary naqtylandy. «Halyq densaýlyǵy jáne densaýlyq saqtaý júiesi týraly» QR Kodeksinde adam aǵzalaryn transplantatsiia jasaýǵa qatysty normalar jetildirildi. Zań jobasy birinshi oqylymda qaralǵannan keiin komitet otyrysynda jan-jaqty zerdelendi. Qosymsha eskertýler men usynystar kelip túsken joq», - dedi Senat depýtaty Baqytjan Jumaǵulov.
Osy Zańǵa qatysty Senat tóraǵasy Máýlen Áshimbaev pikir bildirdi.
«Qabyldanǵan zań ǵylym salasynda sybailas jemqorlyq táýekelderin azaitýǵa arnalǵan qosymsha quqyqtyq negizder qalyptastyrady. Ǵylymi jáne ǵylymi-tehnikalyq qyzmet nátijelerin kommertsiialandyrýdyń jáne barlyq ǵylymi-zertteý jumysyn qarjylandyrýdyń ashyqtyǵyn qamtamasyz etedi. Sonymen qatar ulttyq ǵylymi keńester men Ulttyq memlekettik ǵylymi-tehnikalyq saraptama ortalyǵynyń quziretteri naqtylanady. Ǵylym men tehnikany damytýǵa úles qosqan ǵalymdardy áleýmettik qoldaý men kótermeleý de kózdelip otyr. Osy maqsatpen jyl saiynǵy «Úzdik ǵylymi qyzmetker» syilyǵyn berý qarastyrylǵan. Jalpy, bul zań elimizde ǵylym salasyn damytýǵa óziniń úlesin qosady dep senemiz. Sondai-aq, zańda memlekettik bilim berý mekemeleriniń birinshi basshylarynyń rotatsiiasy qarastyrylǵan. Ol Bilim jáne ǵylym ministrligi belgilegen tártippen júrgiziledi», – dedi M. Áshimbaev.
