Qazaqstannyń Biýdjet kodeksine "Úmitsiz bereshek" túsinigin jáne ol boiynsha kreditordyń talaptaryn toqtatýdy engizý usynyldy. Túzetýler jobasy týraly Qarjy ministrligi túsindirdi, - dep habarlaidy Tengrinews.kz.
"QR keibir zańnamalyq aktilerine biýdjet zańnamasyn jetildirý máseleleri boiynsha ózgerister men tolyqtyrýlar engizý týraly" zań jobasynyń tujyrymdamasy "Ashyq NQA" saitynda jariialanǵan.
"Eldiń nesie portfelin 90-jyldardaǵy ótelmegen qaryzdarmen bailanysty merzimi ótken bereshekterden tazartý maqsatynda "Úmitsiz bereshek" túsinigi jáne olar boiynsha kreditorlardyń talaptaryn toqtatý engizildi", - dep kórsetilgen qujatta.
Sondai-aq, jobada joǵaryda atalǵan nesieler boiynsha boryshkerlerdiń quqyqtyq jaǵdaiy týraly eshqandai aqparat joq ekeni, Ádilet ministrliginiń derekter bazasynda da olar týraly aqparattyń joqtyǵy atap kórsetilgen.
"Osyǵan bailanysty qoldanystaǵy biýdjet zańnamasy aiasynda bar bereshekterdi óndirip alý, sondai-aq olardy esepten shyǵarý boiynsha odan ári jumys júrgizý múmkin emes", - delingen habarlamada.
Qazaqstannyń Qarjy ministrligi usynylǵan tujyrymdamany túsindirdi.
"Áńgime halyqqa (jeke tulǵalarǵa) berilgen nesieler týraly emes. Áńgime 90-jyldary tikelei bizneske berilgen biýdjettik kreditter (kreditor-memleket, ekinshi deńgeidegi bankter emes) týraly bolyp otyr (ákimdikter men Úkimettiń kepildigimen berilgen, óz ainalym qarajatyn tolyqtyrýǵa berilgen direktivtik kreditter jáne basqalar)", - dedi ministrlik.
Vedomstvodaǵylar búgingi kúni esepten shyǵarý somasyn naqty kórsetý múmkin emestigin túsindirdi.
"Qaryz alýshylar men rastaityn qujattardy izdeý jalǵasyp jatyr. 1 qańtardaǵy jaǵdai boiynsha qaryzdyń rettelmegen somasy - shamamen 120 milliard teńge. Úkimettiń talaptaryn toqtatýdyń negizderi zańmen belgilenbegen", - dep tolyqtyrdy baspasóz qyzmeti.
