QR Densaýlyq saqtaý vitse-ministri Ajar Ǵiniiat COVID-19-qa qarsy vaktsinatsiialaý ne úshin qajettigin túsindirip, eldegi epidemiologiialyq ahýaldyń turaqtanǵanyn aitty, dep habarlaidy "Ult aqparat".
«Elimizde epidemiologiialyq ahýal turaqtandy. Kóptegen azamattarymyz ózderiniń kúndelikti isimen ainalysýǵa kirisip, tipti bul infektsiiany umytyp ta ketti. Biraq, elde infektsiianyń taralýyna, kún saiyn aýrýǵa shaldyǵýdyń 700-800 jaǵdaiynyń tirkelýine bailanysty jáne juqpaly aýrý taralýynyń aldyn alý úshin kóptegen el jappai vaktsinatsiia júrgizip jatyr. Qazaqstanda vaktsinatsiia aqpan aiynda bastaldy», - dedi Ajar Ǵiniiat №6 emhanada vaktsinanyń ekinshi dozasyn saldyrǵannan keiin.
Sonymen qatar ol Densaýlyq ministrliginiń basshylyǵy vaktsinanyń ekinshi dozasyn da nelikten jariia túrde alǵandyǵyn túsindirdi.
«Vaktsina qajet. Negizgi maqsattarynyń biri – immýnitetti nyǵaitý jáne aǵzany qorǵaý. Osyǵan orai biz tiimdi ári qaýipsiz vaktsinany ektirýge shaqyramyz», - dedi Densaýlyq saqtaý vitse-ministri.
Ajar Ǵiniiat sáýir aiynda qazaqstandyq vaktsina zertteýiniń úshinshi fazasy aiaqtalýy tiistigin eske salyp ótti.
«Qazaqstandyq vaktsinaǵa qatysty aitar bolsam, qazir klinikalyq synaqtyń úshinshi satysy ótip jatyr. Sáýir aiynda klinikalyq synaqtyń úshinshifazasy aiaqtalýy tiis. Osy zertteýlerdiń qorytyndysy boiynsha qazaqstandyq vaktsina elimizde qoljetimdi bolady», - dedi ol.
Eske sala ketsek, Erlan Qiiasov pen Ajar Ǵiniiat koronavirýsqa qarsy vaktsinanyń alǵashqy dozasyn 1 aqpanda saldyrǵan bolatyn. Vitse-ministrlerge reseilik «Sputnik V» vaktsinasy egildi. Búgin Densaýlyq saqtaý vitse-ministri – Bas memlekettik sanitarlyq dáriger Erlan Qiiasov jáne atalmysh vedomstvonyń taǵy bir vitse-ministri Ajar Ǵiniiat «Spýtnik V» vaktsinasynyń ekinshi dozasyn saldyrdy.
Buǵan deiin QR DSM Sanitariialyq-epidemiologiialyq baqylaý komiteti Vaktsinamen basqarylatyn infektsiialardy baqylaý basqarmasynyń basshysy Nurshai Ázimbaeva «Koronavirýs vaktsinasyn saldyrǵanǵa deiin jáne odan keiin oqshaýlaný kerek pe?» degen suraqqa jaýap bergen bolatyn.
«Shyn máninde oqshaýlaný – adamdardyń basqa bireýlerge virýs juqtyrýynyń aldyn alý úshin kerek. Mundai jaǵdaida koronavirýs vaktsinasyn saldyrǵanǵa deiin jáne odan keiin oqshaýlanýdyń qajeti joq. Biraq adamdar eń aldymen, óziniń qaýipsizdigin oilaýǵa tiis. Sol sebepti vaktsina alatyn adam úshin tolyǵymen karantin rejimin saqtaǵan durys. Vaktsina saldyratyn kez kelgen adamnyń eń birinshiden, deni saý bolýy kerek. Ekpe alǵan adam qorshaǵan ortaǵa qaýipsiz. Vaktsinalanǵan adamǵa koronavirýs juqpaidy. Iaǵni, vaktsina quramynda infektsiialyq negiz joq», - dedi Nurshai Ázimbaeva.
