Qazaqstanda energiia berýshi uiymdardyń sany 39 sýbektige qysqartylady. Bul jaiynda Májilis depýtattarynyń saýalyna orai QR Premer-Ministri Asqar Maminniń bergen jaýabynda aitylǵan, dep habarlaidy "Ult aqparat".
«100 naqty qadam» Ult josparynyń 51-qadamyn oryndaý aiasynda Úkimet energiia berýshi uiymdardy irilendirý boiynsha sharalar ázirledi. Energiia berýshi uiymdarǵa qoiylatyn talaptardyń nátijesinde olardyń sany 2023 jylǵa qarai 149-dan 39 sýbektige deiin qysqaratyndyǵy kútiledi», - dedi Úkimet basshysy.
Aita keteiik, Májilistegi «Aq jol» partiiasy franktsiiasynyń depýtattary atynan joldanǵan saýalda tutynýshylar úshin elektr energiiasyna arnalǵan tarifterdi tómendetý maqsatynda energiia berýshi uiymdardy irilendirý boiynsha naqty sharalar ázirleý usynylǵan bolatyn.
Esterińizge sala ketsek, «100 naqty qadam» Ult josparynyń 51-qadamynda óńirlik energetikalyq kompaniialardy irilendirý energiiamen qamtamasyz etýdiń senimdiligin arttyratyndyǵy, óńirlerge elektr energiiasyn taratýdyń shyǵynyn tómendetetindigi, tutynýshylar úshin elektr energiiasynyń aqysyn azaitatyndyǵy aitylǵan.
