1 shildeden Qazaqstanda elektr energiiasy qymbattaidy. Bul týraly QR Energetika ministrligi Elektr energetikasyn damytý departamentiniń direktory Aidos Dáribaev málim etti, dep habarlaidy QazAqparat.
«Elektr qýaty naryǵynan alynatyn tabystyń kóp bóligi stantsiia jabdyqtaryn jańǵyrtýǵa jáne qaita jańartýǵa baǵyttalýy tiis. Alaida, boljamdyq baǵalaýlar boiynsha bul qarajat óziniń parktik resýrsyn ótegen stantsiialardyń jabdyqtaryn jańǵyrtý men jańartýdy tolyq kólemde júzege asyrýǵa múmkindik bermeidi. Osylaisha, stantsiialardyń tozý deńgeii jyldan-jylǵa artyp keledi jáne qazirgi ýaqytta shamamen 60 paiyzdy quraidy. Osyǵan bailanysty elektrmen jabdyqtaý sapasyna qaýip tónip tur», - dedi A. Dáribaev búgin Ortalyq kommýnikatsiialar qyzmetinde.
Onyń sózine qaraǵanda, energiia óndirýshi uiymdardyń (EÓU) shekti tarifteriniń qazirgi deńgeii EÓU shyǵyndaryn tolyq kólemde jappaidy jáne stantsiialar elektr qýaty naryǵynan kiristerdiń bir bóligin aǵymdaǵy shyǵyndardy jabýǵa baǵyttaýǵa májbúr bolady. Bul fakt elektr qýattarynyń avariialyq isten shyǵýynyń, tutynýshylardy elektrmen jabdyqtaý sapasynyń tómendeýiniń oqiǵalarymen rastalady.
«Osyndai jaǵdai Qazaqstandyq tutynýshylardy kórshi elderden elektr qýattaryn retteý jónindegi qyzmetterdi jylyna 8 mlrd teńgeden astam somaǵa satyp alýǵa májbúr etedi. Bul da elektr energiiasynyń túpkilikti baǵasyna áser etedi», - dedi departament basshysy.
Sonymen qatar ol ministrliktiń quzyretine jeti jyldyq kezeńge energiia óndirýshi uiymdardyń elektr energiiasyn óndirýge arnalǵan shekti tarifterdi bekitý máseleleri kiretinin eske saldy. Halyq úshin tarifterdi túzetýmen Ulttyq ekonomika ministrligi ainalysady.
«Elektr energiiasyna arnalǵan tarifter Zańǵa sáikes 7 jylǵa belgilenedi, bul rette energiia óndirýshi uiymdardyń elektr energiiasyn óndirýge arnalǵan shyǵyndary naqty ulǵaiǵan jaǵdaida, energiia óndirýshi uiymdar ýákiletti organǵa shekti tarifterdi túzetýge ótinim berýge quqyly. Osyǵan bailanysty Qazaqstannyń energiia óndirýshi uiymdary sáýir aiynda toptar boiynsha shekti tarifterdi túzetýge ótinim berdi. 44 energiia óndirýshi uiymnyń 35-inen ótinim berildi. Olardy qaraý kezinde ministrlik ár jaǵdai boiynsha jeke tásildi qoldandy. Der kezinde sheshýdi talap etetin ótinimder nazarǵa alyndy», - dedi Dáribaev.
Buiryqtyń jobasy 2020 jylǵy 10 maýsymda ashylǵan NQA saitynda jariialandy. QR «Atameken» Ulttyq Kásipkerler palatasymen jáne Energetika ministrliginde tirkelgen saraptamalyq uiymdarmen talqylaýlar ótti. Buiryq jobasy qoǵamdyq keńeste qaraldy, sondai-aq ashyq NQA portalynyń elektrondyq alańynda talqylandy.
Tarifterdi túzetý «Elektr energiiasyna shekti tarifterdi bekitý týraly «Qazaqstan Respýblikasy Energetika ministriniń 2018 jylǵy 14 jeltoqsandaǵy № 514 buiryǵyna ózgeris engizý týraly» QR Energetika ministriniń buiryǵymen aǵymdaǵy jyldyń 29 maýsymynda júrgizildi.
«Bul buiryq 2020 jyldyń 1 shildesinen bastap engizilýi tiis. Qazaqstan boiynsha energiia óndirýshi uiymdardyń shekti tarifteriniń ortasha ulǵaiýy 16 paiyz deńgeiinde boljanýda», - dedi departament basshysy.
Onyń atap ótýinshe, birtutas elektr energetikalyq júiesiniń batys aimaǵynan basqa Qazaqstannyń barlyq aimaqtary boiynsha elektr energiiasyn iske asyratyn Ekibastuz GRES-1 shekti tarifi shamaly deńgeide, iaǵni 0,7 paiyzǵa ulǵaiady. Uiymdardyń basqa stantsiialary tarifteriniń ulǵaiýy aiasynda Ekibastuz GRES-1 shekti tarifiniń saqtalýy sońǵy tarifterge eń az deńgeide áser etedi.
«44 energiia óndirýshi uiymnyń 9-y boiynsha tarif burynǵy deńgeide saqtalǵan. Bir energiia óndirýshi uiym boiynsha tarif 7 paiyzǵa tómendetildi. 18 energiia óndirýshi uiym boiynsha tarifi 20 paiyzǵa deiin ósti, qalǵan 16 EÓU-nyń tarifi 20 paiyzdan artyq boldy. Elektr stantsiialarynyń shekti tarifterin ýaqtyly túzetý aldaǵy kúzgi-qysqy kezeńderden sátti ótý jáne biyldan bastap avariialyq jaǵdailardy azaitý úshin olardy jańǵyrtý jónindegi jumysty bastaýǵa múmkindik beredi», - dedi A. Dáribaev.
Vedomstvo málimetinshe, EÓU shekti tarifteri ózgergen kezde statistikalyq ortasha páterler boiynsha sońǵy tutynýshylar úshin elektr energiiasyn tóleýge arnalǵan ortasha chek aǵymdaǵy shottarǵa aiyna 200 teńgeden aspaityn shamaǵa tórtinshi toqsannan erte emes merzimde ulǵaitylýy múmkin.
«Budan basqa, elektr energiiasyna shekti tarifterdi qaita qaraý 44 energiia óndirýshi uiymnyń óndiristik personalynyń 27 myń jumys ornyn saqtaýǵa múmkindik beredi. Sebebi osy adamdardyń jumysynan eldi elektr energiiasymen úzdiksiz qamtamasyz etý tikelei bailanysty», - dedi ol.
