Qazaqstanda eksporttaýshylardy memlekettik qoldaýdyń jańa sharalary engiziledi. Bul jaiynda búgin QR Saýda jáne integratsiia vitse-ministri Azamat Asqaruly aitty, dep habarlaidy "Ult aqparat".
«Shikizattyq emes taýarlar men qyzmetter eksportyn ilgeriletý jónindegi jol kartasy ázirlendi. Ishki jáne syrtqy kedergilerge basa mán beriledi. Olardy joiý bizdiń eksporttaýshylarymyz syrtqy naryqtarǵa shyǵý barysynda tap bolyp otyrǵan teris faktorlardy qysqartýǵa múmkindik jasaidy», - dedi vitse-ministr vedomstvonyń Memleket basshysynyń taiaýdaǵy Joldaýynyń negizgi baǵyttaryn túsindirýge arnalǵan alqa otyrysynda.
Onyń atap ótýinshe, qabyldanǵan sharalar 2025 jylǵa qarai shikizattyq emes eksport kólemindegi ulttyq indikatordy 38 mlrd dollarǵa deiin jetkizýge múmkindik beredi.
«Buǵan qosa, Memleket basshysynyń Joldaýyn júzege asyrý aiasynda ministrlik memlekettik qoldaýdyń jańa sharalaryn engizý boiynsha jumystardy bastap ketti. Bul – kompaniialardy jetildirý tetigi. Bul shara bastapqy kezeńde shaǵyn jáne orta biznestiń eksportqa baǵdarlanǵan, áleýetti, ónimdiligi joǵary sýbektilerin anyqtaýǵa, olardy eksportqa shyǵýǵa odan ary súiemeldeýge múmkindik beredi», - dedi Azamat Asqaruly.
