Jeńis kúni qarsańynda soǵys ardagerleri men tyl eńbekkerlerine qandai áleýmettik kómek kórsetiledi? Bul týraly OKQ-da ótken baspasóz máslihatynda QR Eńbek jáne halyqty áleýmettik qorǵaý vitse-ministri Erlan Áýkenov aityp berdi, dep habarlaidy QazAqparat.
Onyń aitýynsha Qazaqstanda qazirgi tańda Ekinshi dúniejúzilik soǵystyń 1 025 ardageri bar.
«Eńbek jáne halyqty áleýmettik qorǵaý ministrligi Jeńiske úles qosqan azamattardyń bárine materialdyq kómek berýdiń kepildendirilgen shegin bekitý týraly ákimdikterdiń barlyǵyna keńes bergen edi. Osynyń nátijesinde UOS ardagerleri men múgedekterine 1 mln teńge kóleminde bir rettik materialdyq kómek berildi», - dedi ol.
Vitse-ministr, sonymen qatar, Leningrad qorshaýynda qalǵan turǵyndar men kontslagerlerdiń kámeletke tolmaǵan tutqyndaryna 50 myń teńgeden, al UOS-nyń qaitys bolǵan ardagerleriniń jubaiyna, sonymen qatar soǵys jyldary eńbek etken tyl eńbekkerlerine 30 myń teńgeden beriletinin málim etti.
«Tólem barlyq aimaqta júrgiziledi. Jeti óńirde berilip te qoidy. Olar: Aqtóbe, Atyraý, ShQO, Qaraǵandy, Qyzylorda oblystary men Nur-Sultan, Almaty qalalary. Basqa óńirlerde jaqyn arada bárine tabystalady», - dedi Erlan Áýkenov.
