QR Ishki ister ministri Erlan Turǵymbaevtyń tapsyrmasymen, túrmege qamalǵandarǵa tiisti jaǵdai jasaý maqsatynda aǵymdaǵy jyldyń sońynan deiin ortasha qaýipsizdiktegi eki túzeý mekemesi: Qostanai oblysyndaǵy Qusmuran kentinde ornalasqan ÝK-161/4 jáne Shyǵys Qazaqstan oblysyndaǵy Shýaq kentindegi OV-156/17 mekemesin jabý josparlanǵan. Bul týraly "Ult aqparat" QR IIM QAJ komitetine silteme jasap habarlaidy.
«Belgili bolǵandai, sońǵy onjyldyqta Qazaqstanda túrmege qamalǵandar sany eki eseden kóp azaiǵan. Osyǵan bailanysty, biz eń eski, sáýlet jáne tehnika jaǵynan eskirgen abaqtylardy birtindep jabý boiynsha jumystardy júrgizip júrgenimizge birneshe jyl boldy. Mysaly, byltyr tórt mekeme jabyldy. Negizinen oblys ortalyqtarynan alys ornalasqan mekemeler jabylýda, sebebi ondaǵy sottalýshylardy jumysqa turǵyzyp, qyzmetkerlerdi jumysqa alý máseleleri kúrdeli. Únemdelgen qarjy basqa penitentsiarlyq mekemelerdi materialdyq-tehnikalyq jaǵynan nyǵaitýǵa baǵyttalady», - dep atap ótti IIM QAJ komiteti tóraǵasynyń m.a Esqali Salamatov.
Komitettiń habarlaýynsha, jabylyp otyrǵan mekemelerdiń qyzmetkerleri jumysyn vedomstvonyń basqa bólimshelerinde jalǵastyrady. Al ondaǵy sottalýshylarǵa keletin bolsaq, olar kommýnaldyq-tehnikalyq jaǵdaiy jaqsy osyǵan uqsas jaqyn mekemelerge birtindep kóshiriledi.
Sondai-aq, zańnama talaptaryna sáikes, mekeme basshylyǵy sottalýshynyń jazasyn óteý ornyna kelýi jóninde onyń eń jaqyn týystary nemese zańdy ókilderine ýaqytyly, jazbasha úlgide eskertý jiberedi.
