Qazaqstanda eki-aq dárethana álemdik standartqa sai keledi. Olar Astanadaǵy N.Nazarbaev áýejaiynyń jańa terminaly men elordadaǵy jańa temirjol vokzalynda ornalasqan. Bul týraly búgin QR Mádeniet jáne sport vitse-ministri Erlan Qojaǵapanov aitty, dep habarlaidy Baq.kz tilshisi.
Vitse-ministrdiń aitýynsha, Dúniejúzilik týristik keńes normasyna sai ár 50 shaqyrym saiyn bir dárethanadan bolýy tiis. Ári álemdik standartqa sai bolý úshin ájethana sapaly bolýy kerek. Onda mindetti túrde ystyq sýy bolýy tiis.
«Biz jańa zań jobasynda jol boiyndaǵy serviske basa nazar aýdaryp otyrmyz. Biz qai joldy alsaq ta olardyń boiynda eshqandai servis joq. Jóni túzý dárethana joq. Biz eriktilerdiń kómegimen eldegi búkil ájethanany tekserdik. Qazaqstanda halyqaralyq standartqa sai eki aq dárethana bar. Bireýi – Astanadaǵy N.Nazarbaev áýejaiynyń jańadan salynǵan terminalynda, ekinshisi – elordada jańadan salynǵan temirjol vokzalynda ornalasqan. Ókinishke orai, elimizde halyqaralyq normaǵa sáikes basqa birde-bir ájethana joq», - dedi Qojaǵapanov.
Vitse-ministrdiń málimetinshe, Qazaqstanda jol boiyndaǵy servisti kózdeitin KazWay jobasy áli shiki, oǵan qazir ózgerister engizilip jatyr.
«Búgingi tańda sheteldik týrister joldan dárethana taba almaidy. Al bar ájethanalardyń túri adamdy uialtady. Sol úshin biz jańa zańda jáne memlekettik baǵdarlamada jol boiynda turǵan mekemelerdi memlekettik jeńildiktermen qamtamasyz etý máselelerin qarastyramyz. Osy salada endi belsendi jumys atqaramyz», - dedi Erlan Qojaǵapanov.
Atap ótsek, búgin Ádilet ministrliginde «Qazaqstan Respýblikasynyń keibir zańnamalyq aktilerine týristik qyzmet máseleleri boiynsha ózgerister men tolyqtyrýlar engizý týraly» Zań jobasynyń tujyrymdamasy qaralǵan bolatyn.
