Foto: ashyq derekkóz
Qazaqstanda dron arqyly taýar jetkizý qyzmeti iske qosylady. 26 jeltoqsanda QR Jasandy intellekt jáne tsifrlyq damý ministrligi men Freedom Lifestyle ushqyshsyz jetkizý servisterin damytý jóninde memorandýmǵa qol qoidy, dep habarlaidy Ult.kz.
Qujat aiasynda Almaty qalasynda pilottyq joba júzege asyrylady. Drondar azyq-túlik, kúndelikti tutyný taýarlary men dári-dármekterdi 3 shaqyrymǵa deiingi radiýsta, salmaǵy 10 kelige deiin jetkize alady. Ushýlar kúndizgi ýaqytta jáne qolaily aýa raiynda ǵana oryndalady.
Pilottyq jobany 2026 jyldyń qańtar–naýryz ailarynda iske qosý josparlanǵan. Qaýipsizdik pen turǵyndardyń jailylyǵyna basymdyq beriledi. Joba sátti júzege asqan jaǵdaida, dronmen jetkizý servisterin eldiń basqa óńirlerine, sonyń ishinde aýyldyq aimaqtarǵa keńeitý kózdelip otyr.
