Dini bilimdi shetelde alýǵa qatysty Qazaqstanda tiisti shekteýler engiziledi. Bul týraly búgin Májiliste «QR keibir zańnamalyq aktilerine dini qyzmet jáne dini birlestikter máseleleri boiynsha ózgerister men tolyqtyrýlar engizý» týraly zań jobasyn tanystyrý barysynda belgili boldy, dep habarlaidy Ult.kz tilshisi QazAqparat agenttigine silteme jasap.
«Biz úshin mańyzdy máselelerdiń biri, dini bilimdi berýdi jáne dini ýaǵyz-nasihatty mindetti túrde dini birlestikten alǵan quqyǵy bar azamattar, iaǵni bilikti mamandar ǵana júrgizýi qajet degen ustanymdy qoldaimyz. Ol - asa mańyzdy. Óitkeni elimizde zańnamalardy negizge ala otyryp, jumys isteitin 2600-den astam meshitimiz, sondai- aq ondaǵan bilim beretin oqý oryndar bar. Osyǵan sáikes, bilikti adamdar da barshylyq», - dedi Qazaqstannyń Bas múftii Serikbai qajy Oraz Májiliste tilshilerge bergen suhbatynda.
Onyń sózine qaraǵanda, dini bilimdi jetik bilmegen adamdar óz kózqarasyn aityp, nasihatqa kirisip nemese teris aǵym músheleriniń keibir páterlerde top quryp, sol jerlerde dáris ótkizip jatqan tustaryna osy zań jobasynda tiisti sheshim qarastyrylǵan.
«El azamattary dini bilimdi ózimizdiń otandyq oqý oryndarynda alǵannan soń, iaǵni túbegeili bilimin qalyptastyrǵannan keiin ǵana biliktiligin jetildirý maqsatynda sheteldegi basqa oqý oryndaryna joldama ala alady degen usynys oryndy», - dep oiyn bildirdi Bas múfti.
Óz kezeginde QR Din isteri jáne azamattyq qoǵam ministri Nurlan Ermekbaev Qazaqstanda bazalyq dini bilim almaǵandarǵa dini bilimdi shetelge baryp oqýyna shekteý engizý kózdelip otyrǵandyǵyn naqtylady.
