WhatsApp-ta Qazaqstanda defolt jáne azyq-túlik tapshylyǵy bolatyny týraly aqparat tarap jatyr. Avtor halyqty tez arada jyljymaityn múlik satyp alýǵa, qolda bar aqshany valiýtaǵa aiyrbastaýǵa, sondai-aq tez buzylmaityn ónimderdi satyp alyp, qor jasap alýǵa shaqyrady, dep habarlady Stopfake.kz saity.
Osy oraida, Aýyl sharýashylyǵy ministrligi azyq-túlik tapshylyǵy bolatyny týraly qaýesetti joqqa shyǵardy.
– Elimizdegi azyq-túlik qaýipsizdigi, sondai-aq aýyl sharýashylyǵy qurylymdarynyń úzdiksiz jumysy máselesi turaqty baqylanady. Jedel derekter boiynsha, respýblika boiynsha barlyǵy 1,5 mln tonna áleýmettik mańyzy bar azyq-túlik taýarlarynyń (ÁMAT) qory bar, onyń ishinde un – 145,1 myń tonna, qant – 47,6 myń tonna, kúrish – 40,2 myń tonna, makaron – 21,3 myń tonna jáne 1 mln tonna kókónis ónimderi jáne t.b., – dep habarlady vedomstvodan.
Sondai-aq, ministrliktiń habarlaýynsha, eldegi azyq-túlik qory únemi tolyqtyrylyp otyrady. Un óndirý úshin jarma men astyq jetkilikti, al mal basy et ónimderin óndirýge jetkilikti.
– Respýblika óz óndirisi esebinen ishki astyq naryǵyndaǵy qajettilikti tolyq kólemde qamtamasyz ete alady, – dep habarlady AShM.
Vedomstvo ókilderi Qazaqstanda AÓK damytýdyń 2021-2025 jyldarǵa arnalǵan Ulttyq jospary iske asyrylyp jatqanyn eske saldy, onyń aiasynda importty almastyrý boiynsha belsendi jumys júrgizilýde.
Qazirgi ýaqytta Qazaqstanda defoltqa alǵysharttar joq. Standard&Poor’s halyqaralyq reitingtik agenttigi Qazaqstannyń táýelsiz kredittik reitingin «BBB-/A-3» deńgeiinde rastady, boljam «Turaqty». Agenttiktiń derekterine sáikes, Reseige qatysty ekonomikalyq sanktsiialardyń qaitalama saldaryn eńserýge bolady jáne Qazaqstanda bul munai men gaz eksportynyń negizgi naryqtaryna qol jetkizýde irkilisterge ákelmeidi.
