Búginde xalyqqa tegin taratylatyn dáriler «eń arzan baǵa» qaǵidasy boiynsha satyp alynady. Aldaǵy ýaqytta atalǵan júieni barlyq preparattarǵa taratý josparlanǵan, dep xabarlaidy QazAqparat tilshisi.
QR Densaýlyq saqtaý ministri Eljan Birtanovtyń aitýynsha, dári-dármek jetkizýshi kompaniialar aldymen baǵany tirkep, ashyq kórsetedi. Atalǵan baǵa naqty derekterge negizdelýi shart. Ol úshin 39 eldiń baǵalary alynady. Onyń ishinde Eýropa memleketteri de bar.
«Sebebi keibir jetkizýshi kompaniialar Eýropaǵa arzan baǵamen tasidy. Al Eýraziialyq ekonomikalyq odaq elderine qymbatqa satady. Osyǵan bailanysty biz 39 eldiń qataryna Eýropany da qostyq. Sóitip, biýdjet tarapynan satyp alynatyn dárilerdiń baǵasy eń tómengi bes baǵanyń ishinen tańdalady», - dedi E.Birtanov Astanada ótken baspasóz máslixatynda.
Onyń sózine qaraǵanda, ázirshe atalǵan júie tek memlekettik satyp alýlarǵa ǵana taralady. Aldaǵy ýaqytta ony barlyq preparattarǵa taratý josparlanyp otyr.
«Qazir barlyq dári-dármekterdiń baǵasyn tirkeýge arnalǵan zań jobasy Parlamentte jatyr. Atalǵan qujat birinshi oqylymnan ótti. Jyldyń aiaǵyna deiin qabyldanady degen senim bar. Sóitip, kelesi jyldan bastap barlyq meditsinalyq preparattardyń baǵasy tirkeýge alynady. Ónim óndirýshiler óz baǵasyn saittar arqyly ashyq kórsetedi. Biraq basqa memleketterdiń baǵalaryn da salystyrmaly túrde kórsetýge mindetti bolady. Sonda ádil baǵa bolady», - dep atap kórsetti E.Birtanov.
Aita keteiik, baspasóz máslixatynda ministr bosanǵan áielderdiń ólimine sebep bolatyn negizgi máselelerdi atady.
Onyń aitýynsha, jyldyń aiaǵyna deiin tegin dári-dármek máselesi tolyǵymen sheshiledi.
