Aýyl sharýashylyǵy ministrligi áleýmettik mańyzdylyǵyna bailanysty 2020 jyly jarma daqylynyń alqabyn ulǵaitýdy kózdep otyr, dep habarlaidy "Ult aqparat".
«Elimizdiń jekelegen oblystary úshin ótken jyl qysyltaiań boldy. Atap aitqanda, 2019 jyldyń egin jinaý qorytyndysy boiynsha 17,4 mln tonna astyq bastyryldy. Bul 2018 jylǵy deńgeiden 2,9 mln tonnaǵa nemese 14,3 paiyzǵa tómen. Shilde-tamyz ailaryndaǵy aptap ystyq uzaq jańbyrǵa ulasyp, munyń saldary jinalǵan ónim kólemine de, sapasyna da áser etti», - dedi aýyl sharýashylyǵy vitse-ministri Aidarbek Saparov vedomstvonyń alqa májilisinde.
Vitse-ministrdiń aitýynsha, jalpy negizgi aýyl sharýashylyǵy daqyldarynyń kópshiligi boiynsha óndiris kólemi men ónimdilik ortasha ósimdi kórsetken.
«Aqtóbe jáne Mańǵystaý oblystaryn qospaǵanda barlyq oblys jemshóp daqyldary boiynsha memorandýmnyń indikativti kórsetkishterine qol jetkizbegenin jeke atap ótkim keledi. Oblys ákimdikterine jemshóp daqyldarynyń alqabyn keńeitý úshin jaǵdaidy túzetý boiynsha shara qabyldaý qajet. 2020 jyly aýyl sharýashylyǵy daqyldaryn 22,5 mln ga jerge egý josparlanýda. Bul kórsetkish 2019 jylǵy deńgeiden 240 myń ga artyq», - dedi ol.
Biyl maily, jemshóp, kókónis-baqsha daqyldary men kartoptyń alqaby ulǵaitylmaq.
«Ótken jyly qaraqumyq alqaby 2018 jylmen salystyrǵanda 29,4 myńǵa qysqarǵanyn aita ketý kerek. Alqaptardyń kúrt qysqarýy Shyǵys Qazaqstan (11,7 myń ga), Pavlodar (9,2 myń ga), Qostanai (7,0 myń ga) oblystarynda baiqaldy. Bul qaraqumyq jarmasynyń qunyna áser etip, barlyq óńirde onyń qymbattaýyna ákep soqtyrdy. Osyǵan bailanysty atalǵan jarma daqylynyń alqabyn onyń áleýmettik mańyzdylyǵyna bailanysty ulǵaitý qajet dep sanaimyz», - dedi Aidarbek Saparov.
