Qazaqstanda birqatar memlekettik organnyń qyzmetke qabyldaý sharttary jeńildetildi, dep habarlaiy "Ult aqparat" QR Memlekettik qyzmet isteri agenttiginiń baspasóz qyzmetine silteme jasap.
«Prezident janyndaǵy Ekonomikalyq ósýdi qalpyna keltirý jónindegi memlekettik komissiia koronavirýs indeti tarap jatqan tusta densaýlyq saqtaý organdarynda memlekettik qyzmetke taǵaiyndaýdy jáne konkýrstyq rásimderdi jedeldetip júrgizý máselesin pysyqtaýdy tapsyrǵan bolatyn. Bul rette karantin kezeńinde Úkimettiń áleýmettik blogyna júktelgen aǵymdaǵy jáne aldaǵy mindetterdi eskere otyryp, jedeldetilgen konkýrstyq rásimderdi halyqty áleýmettik qorǵaý (aǵymdaǵy jaǵdailarda áleýmettik sharalardy qamtamasyz etý jónindegi mindetterge bailanysty) jáne bilim berý (pandemiia kezeńinde úzdiksiz bilim berý protsesin sapaly uiymdastyrý jónindegi mindetterge bailanysty) salalaryndaǵy organdarǵa taratý týraly sheshim qabyldandy», - delingen habarlamada.
Osyǵan qarai, konkýrstyq rásimderdiń merzimin qysqartý osy organdardaǵy bos jumys oryndaryn jedel toltyrýǵa, vedomstvolarǵa júktelgen osy mindetterdi ýaqtyly oryndaýǵa yqpal etedi. Joǵaryda aitylǵandardy eskere otyryp, Memlekettik qyzmet isteri agenttiginiń 2020 jyldyń 22 shildedegi buiryǵymen konkýrsty ótkizý Erejesine tiisti túzetýler engizildi.
«Máselen, engizilgen túzetýlerge sáikes, karantin kezeńinde densaýlyq saqtaý, eńbek jáne halyqty áleýmettik qorǵaý, bilim jáne ǵylym ministrlikteri, sondai-aq ákimdikterdiń densaýlyq saqtaý, halyqty jumyspen qamtý jáne bilim berý salasyndaǵy bólimsheleri laýazymdaryna konkýrstar ótkizý merzimi qysqartyldy. Osylaisha, konkýrstyq rásimder jiyrma eki kúnnen tórt kúnge deiin qysqartyldy», - delingen QR Memlekettik qyzmet isteri agenttiginiń baspasóz qyzmeti taratqan málimette.
