Qazaqstan koronavirýs naýqastarynyń statistikasyn eki bólek júrgizip keledi. Biri – virýs juqqany PTR testimen dáleldengen naýqastardyń deregi (KVI+), biri – PTR testimen dáleldenbegen, biraq aýrý belgileri boiynsha koronavirýsqa uqsaityn pnevmoniia naýqastarynyń deregi (KVI-).
961 naýqastyń 901-inde PTR testi oń nátije kórsetken. Qalǵanyna koronavirýs pnevmoniiasy diagnozy qoiylǵan. Jańa tirkelgen 10 ólimniń toǵyzy KVI+ naýqastary, bireýi KVI- naýqastary qatarynda bolǵan.
PTR testimen rastalǵan naýqastardyń aimaq boiynsha deregi mynadai:
Nur-Sultan qalasynda – 24224 (+136 adam naýqastar tizimine qosyldy),
Almaty qalasynda – 24044 (+103),
Shyǵys Qazaqstan oblysynda – 21453 (+61),
Atyraý oblysynda – 16848 (+39),
Pavlodar oblysynda – 16728 (+103),
Qaraǵandy oblysynda – 14960 (+57),
Aqmola oblysynda – 12946 (+86),
Batys Qazaqstan oblysynda – 12412 (+83),
Soltústik Qazaqstan oblysynda – 11993 (+39),
Qostanai oblysynda – 11714 (+69),
Almaty oblysynda – 10334 (+57),
Shymkent qalasynda – 6040 (+10),
Jambyl oblysynda – 5807 (+14),
Túrkistan oblysynda – 4233 (+2),
Mańǵystaý oblysynda – 4179 (+5),
Aqtóbe oblysynda – 4151 (+20),
Qyzylorda oblysynda – 3759 (+17).
KVI+ naýqastarynyń jalpy sany osymen 205 825-ke jetip otyr. Onyń 189 750-i jazylǵan, 13 392-si emdelip jatyr. Bul sanattaǵy naýqastardyń 2683-i qaitys bolǵan. Densaýlyq saqtaý ministrligi bul statistikaǵa koronavirýs juqtyrǵany rastalǵan, biraq "ózge sebepten óldi" degen júzdegen adamdy kirgizbei otyr.
Statistikasy byltyr tamyzdan beri júrgizilip kele jatqan KVI- naýqastarynyń sany 48 887-ge jetti. Onyń 40 101-i jazylyp shyqqan, 605-i qaitys bolǵan.
19 aqpandaǵy málimet boiynsha, 21 573 adam koronovirýs infektsiiasynan (13 392 KVI+ jáne 8 181 KVI-) emdelip jatyr.
Onyń ishinde 4 891 patsient - statsionarda, 16 682 naýqas ambýlatoriialyq deńgeide em qabyldaýda.
Koronavirýs juqtyrǵandar arasynda:
• 255 adamnyń jaǵdaiy aýyr;
• 43 patsienttiń jaǵdaiy óte aýyr;
• 41 naýqas ÓJJ apparatynda jatyr.
Qazaqstanda jergilikti sarapshylar koronavirýs statistikasynyń azaitylyp kórsetetinin aitady. Byltyr maýsym, shilde ailarynda PTR testi teris nátije kórsetken, biraq aýrý belgileri boiynsha koronavirýsqa uqsaityn pnevmoniia jaǵdailary kúrt kóbeigen.
Máselen, byltyr 1-8 shilde aralyǵynda pnevmoniiamen 56 809 naýqas tirkelse, onyń 39 702-inde aýrý belgisi koronavirýsqa uqsaǵan. Olardyń eshqaisysy koronavirýs statistikasyna qosylmady. Bilik pnevmoniia indetiniń taraýy basyla bastaǵannan keiin ǵana, 1 tamyzdan bastap koronavirýs pnevmoniiasynyń statistikasyn júrgize bastady. Biraq bastapqyda ýáde etkendei, ortaq statistikaǵa biriktirip emes, bólek jariialap otyrdy.
Kúzde "Sandj" zertteý ortalyǵy saýalnama qorytyndysyn jariialap, tamyzǵa deiin 3,8 million adamnyń koronavirýspen aýyryp shyqqanyn, onyń resmi statistikadan 37 ese kóp kórsetkish ekenin málimdegen.
