QR Premer-Ministri Asqar Mamin Úkimettiń Tsifrlyq keńsesinde ortalyq memlekettik organdar basshylarynyń jáne óńir ákimderiniń qatysýymen áleýmettik mańyzy bar azyq-túlik taýarlarynyń (ÁMAT) baǵalaryn retteý máseleleri jóninde keńes ótkizdi, dep habarlaidy "Ult aqparat" primeminister.kz saityna silteme jasap.
Qazirgi jaǵdai men atqarylyp jatqan jumystar týraly Ulttyq bank tóraǵasy Erbolat Dosaev, saýda jáne integratsiia vitse-ministri Erjan Qazanbaev, Aýyl sharýashylyǵy birinshi vitse-ministri Aidarbek Saparov, Básekelestikti qorǵaý jáne damytý agenttiginiń tóraǵasy Serik Jumanǵarin, Batys Qazaqstan oblysynyń ákimi Ǵali Esqaliev, Shyǵys Qazaqstan oblysynyń ákimi Danial Ahmetov, Aqmola oblysynyń ákimi Ermek Marjyqpaev, Atyraý oblysynyń ákimi Mahambet Dosmuhambetov, Qyzylorda oblysynyń ákimi Gúlshara Ábdiqalyqova jáne taǵy basqalary baiandady.
Ótken aptada respýblika boiynsha áleýmettik mańyzy bar azyq-túlik taýarlary baǵasynyń jalpy ósý indeksi 0,0% qurady. Qabyldanǵan sharalar esebinen sábiz (-3,1%), piiaz (-2,2%), kartop (-0,8%) baǵasynyń tómendeýi baiqalady. Súzbe, kúnbaǵys maiy, kúrish jáne tuz baǵasy ózgergen joq.
Óńirlerde «ainalym shemasyn» qarjylandyrý 46,6 mlrd teńgege jetti. Nysanaly deńgei 93,2% qamtamasyz etildi. «Ainalym shemasy» boiynsha tiimdi jumys Nur-Sultan, Almaty jáne Shymkent qalalarynda, Almaty, Shyǵys Qazaqstan, Batys Qazaqstan, Qostanai jáne Soltústik Qazaqstan oblystarynda baiqalady.
Ótken aptada Básekelestikti qorǵaý jáne damytý agenttigi ártúrli baǵalardy qoiý turǵysynan ústem jaǵdaidy teris paidalaný belgileri boiynsha: Soltústik Qazaqstan oblysynda taýyq jumyrtqasyn óndirýshilerge, Nur-Sultan qalasynda taýyq jumyrtqasyn kóterme saýdada jetkizýshige, Aqtóbe oblysynda taýyq etin kóterme saýdada jetkizýshige, Almaty oblysyndaǵy taýyq jumyrtqasyn óndirýshilerge baǵany ustap turý bóliginde básekelestikke qarsy kelisilgen áreketteri úshin 6 habarlama shyǵardy.
Qyzylorda jáne Batys Qazaqstan oblystaryndaǵy óndirýshilermen jáne saýda jelilerimen monopoliiaǵa qarsy komplaenstiń 4 aktisi jasaldy. Jalpy, respýblika boiynsha monopoliiaǵa qarsy komplaenstiń 139 aktisi jasaldy.
Batys Qazaqstan oblysynda et jáne taýyq jumyrtqasy, nan men un, makaron ónimderin óndirýshilerdiń baǵanyń ósýi múmkin ekeni týraly jariia málimdemesi úshin monopoliiaǵa qarsy zańnamany buzýǵa jol bermeý týraly 6 eskertý jasaldy.
Aldyn ala derekter boiynsha, qus fabrikalary tarapynan monopoliiaǵa qarsy zańnamany buzý belgileri baiqalýda. Qaitalanatyn buzýshylyqtar boiynsha tergeý habarlamalar shyǵarylǵan kúnnen bastap kúntizbelik bir jyl ishinde júrgiziledi.
Premer-Ministr óńirlerdiń ákimderine baǵany baqylaýdy jáne áleýmettik mańyzy bar azyq-túlik ónimderiniń árbir pozitsiiasy boiynsha tiisti jedel sharalar qabyldaýdy, baǵanyń ósýine jol bermeý úshin azyq-túlik taýarlaryn dúken sórelerine ýaqytyly jetkizýdi qolmen qamtamasyz etýdi tapsyrdy.
Egin jinaý naýqanynyń aiaqtalýyn jáne aldaǵy merekelerdi eskere otyryp, ákimdikterge bir apta ishinde óńirlerdi unmen 100% deiin qamtamasyz etý, buǵan deiin bekitilgen normativterge sáikes negizgi kókónister boiynsha qorlardy tolyqtyrý, sondai-aq deldalsyz saýda jelileri men óndirýshiler arasynda forvardtyq satyp alý sharttaryn jasasýdy qamtamasyz etý tapsyryldy.
