Aýyl sharýashylyǵy birinshi vitse-ministri Aidarbek Saparov Qazaqstanda astyq tapshy degen aqparatty joqqa shyǵardy, dep habarlaidy Sputnik Qazaqstan.
"BAQ-ta un tartýshy kásiporyndar shikizat jetispeýine bailanysty jumysyn toqtatqany týraly aqparat tarady. Eshqandai astyq tapshylyǵy joq. Respýblikada bidai jetkilikti. Sondyqtan azamattardy dúrlikpeýge shaqyramyn", - dedi Saparov ortalyq kommýnikatsiialar qyzmetinde ótken baspasóz máslihatynda.
Onyń aitýynsha, 1 sáýirdegi jaǵdai boiynsha respýblikada 6,4 mln tonna bidai bar. Vitse-ministr ishki qajettilikti eskersek, bul kólem eldi qamtamasyz etýge jetkilikti ekenin atap ótti. Tipti, astyqtyń bir bóligin eksportqa da shyǵarýǵa bolady.
"Jyl saiyn biz shamamen 3 mln tonna un shyǵaramyz. Biraq bul kólemniń jartysy eksporttalady. Iaǵni elde óndirilgen unnyń bári ishki naryqta qalmaidy. Keibir diirmender tek eksportqa ǵana jumys isteidi", - dedi ol.
Saparovtyń aitýynsha, másele bidai tapshylyǵynda emes, bidai baǵasynda.
Buǵan deiin un tartatyn kásiporyndar bidaidy arzan baǵaǵa Reseiden importtap kelgen. Ásirese shekaralas oblystar: Pavlodar, Soltústik Qazaqstan. Alaida Resei dándi daqyldardy syrtqa shyǵarýǵa tyiym salǵannan keiin bul balans buzyldy. Kórshi eldiń mundai sheshimi diirmenshilerdi astyqty tez arada ishki naryqtan satyp alýǵa itermelep otyr. Al ishki naryqta tiisinshe bidai baǵasy ósken.
"Bul rette 6,4 mln tonna bidaidyń 3,4 milliony – aýyl sharýashylyǵy taýaryn óndirýshilerde. Olar óz ónimine joǵary baǵa suraidy. Biraq fermerlerge kóktemgi egis jumystaryna aqsha kerek ekenin túsiný qajet. Osyǵan bailanysty bidai baǵasy ádil bolǵan jaǵdaida fermerler óz qorlaryn satady", - dedi Saparov.
Aitýynsha, ishki naryqta tapshylyq týǵyzbaý úshin vedomstvoaralyq komissiia 2022 jylǵy 15 sáýirden 15 maýsymǵa deiin un men bidai eksportyn kvotalaý týraly sheshim qabyldaǵan. Bidaiǵa kvota kólemi – 1 mln tonna, al unǵa – 300 myń tonna.
Sondai-aq ishki naryqtaǵy ahýaldy jete túsiný úshin aýyl sharýashylyǵy ministrligi statistika biýrosymen jáne jergilikti atqarýshy organdarmen birlesip, óńirlerde bidaiǵa inventarizatsiia júrgizedi.
Vitse-ministrdiń aitýynsha, 7 sáýirdegi jaǵdai boinysha respýblikada un qory 118 myń tonnany quraidy.
Buǵan deiin qazaqstandyq diirmenshilerdiń astyq tapshylyǵyna jáne onyń baǵasynyń qymbattaýyna tap bolǵany habarlandy. BAQ aqparatynsha, bir tonna bidaidyń baǵasy 160 myń teńgege jetken jáne onyń otandyq naryqta tapshylyǵy baiqalady. Diirmenderdiń jartysynan kóbi jumysyn toqtatqan.
