© Photo: Press-slýjba Qazaq oil
Qazaqstanda benzin men dizel otynynyń baǵasy qymbattaidy. Bul týraly QR Energetika ministriniń mindetin atqarýshy Bolat Aqsholaqov aitty, dep habarlaidy QazAqparat.
«Qazirgi tómen baǵalardy saqtap otyrsaq, biz qansha janarmai óndirsek te, barlyq suranysty qamtamasyz ete almaimyz.
Ekinshiden, baǵalar arasyndaǵy aitarlyqtai aiyrmashylyqqa bailanysty kórshi elderge «aǵyn» jalǵasa beredi, onyń kólemi arta túsedi. Eshqandai shekteýler nátije bermeitini anyq.
Úshinshiden, janarmai baǵasyndaǵy disproportsiia kóleńkeli naryqty nyǵaityp, ulttyq ekonomikaǵa, múddege keri áserin tigizedi.
Tórtinshiden, janarmai boiynsha tómen baǵany saqtaý munai-gaz salasyna investitsiia tartýǵa, ony damytýǵa, geologiialyq barlaý jumystaryn júrgizip, resýrstyq bazany tolyqtyrýǵa múmkindik bermei otyr», - dedi Aqsholaqov Ortalyq kommýnikatsiialar qyzmetindegi baspasóz máslihatynda.
Onyń aitýynsha, ishki naryqtaǵy janarmai jaǵdaiyn turaqtandyrý úshin Qazaqstannyń kórshi eldermen salystyrǵandaǵy baǵa boiynsha aiyrmashylyǵyn azaitý qajet.
«Bul qiyn, biraq qajet sheshimge barý kerekpiz, ony moiyndaý kerek, iaǵni bólshek saýdadaǵy janarmai baǵasyn kóterý qajet. Osy turǵyda AI-92 jáne AI-93 markaly benzinge baǵa litrine 182-187 teńgeden 205 teńgege deiin jetkizilmek, ósim – 11%. Dizel otynynyń baǵasy litrine 295 teńgeni quraidy, ortasha eseppen ósim – 20%. Qazir óńirge bailanysty baǵa 230 teńgeden 260 teńgege deiin bolyp tur. Osyndai buiryqtyń jobasy búgin jariialanatyn bolady», - dedi Bolat Aqsholaqov.
Onyń sózinshe, baǵa boiynsha aiyrmashylyq máselesin qazir qolǵa almasaq, aldaǵy ýaqytta eleýli tapshylyq bolýy múmkin. Budan basqa, ekonomikalyq mańyzdy salany damytý múmkindiginen airylyp, elimizdiń energetikalyq qaýipsizdigine de áser etedi.
