Búginnen bastap Qazaqstanda bazalyq zeinetaqyny esepteýdiń jańa júiesi engiziledi. Oǵan sáikes, bir millionǵa jýyq zeinetkerdiń bazalyq zeinetaqysy eki esege ósti, dep xabarlaidy QazAqparat tilshisi.
QR Eńbek jáne xalyqty áleýmettik qorǵaý vitse-ministri Svetlana Jaqypovanyń aitýynsha, bazalyq zeinetaqynyń mólsheri eńbek ótili men zeinetaqy júiesine qatysý merzimine táýeldi bolady. Búginde bazalyq zeinetaqy barlyǵyna birdei tólenip otyr. Al onyń mólsheri eń tómengi kúnkóris deńgeiiniń 54 protsentin quraidy. Ol - shamamen 15 274 teńge. Endi, bazalyq zeinetaqy eńbek ótili men zeinetaqy júiesine qatysý merzimine qarai tólenedi.
«Máselen, zeinetkerdiń eńbek ótili bolmasa, sosyn zeinetaqy jinaqtaý júiesine múldem qatyspasa, ia bolmasa, eńbek ótili 10-aq jyl bolsa, oǵan jańaǵy eń tómengi kúnkóris deńgeiiniń 54 protsentin - 15 274 teńgeni tólene beredi. Al 10 jyldan artyq eńbek ótili bar adamǵa qosymsha árbir jyl úshin 2 protsent qosylady. Sonda 33 jyldyq eńbek ótili bar adam bazalyq zeinetaqynyń tolyq mólsherin - 28 284 teńgeni ala alady. Árbir adam óziniń zeinetaqy mólsherin «elektrondy úkimet» portalynan, ia bolmasa, «Azamattarǵa arnalǵan úkimettiń» front-keńselerinen bile alady. Sol jerde tolyq anyqtamany da alýǵa múmkindik bar. Búginde qaita esepteý sharalary atqarylyp, árbir adamnyń zeinetaqysy avtomatty túrde belgilendi. Sondyqtan qosymsha qujattardy ákelýdiń qajeti joq», - deidi S.Jaqypova.
Budan bólek, belgili bir sebepterge jinaqtaýshy zeinetaqy júiesine qatysa almaǵan keibir azamattarǵa jeńildik jasalady, olardyń jumyssyz júrgen jyldary eńbek ótili dep jazylady. «Birinshiden, bala kútimimen úsh jyl júrip qalǵandarǵa atalǵan ýaqyt eńbek ótili dep jazylady. Biraq ol ýaqyt 12 jyldan aspaýy tiis. Sol siiaqty I jáne II toptaǵy múgedekterge, sondai-aq, 80 jastan asqan adamdarǵa kútip jasaǵandarǵa da eńbek ótili jazylady. Sosyn áskeri adam qyzmet babyna bailanysty basqa bir jerge jiberilse, al ol jerde onyń jubaiyna jumys tabylmasa, onyń da ótkizgen ýaqyty eńbek ótiline jatqyzylady. Diplomattardyń jubailaryna da týra sondai jeńildik jasalady», - dep atap kórsetti S.Jaqypova.
Resmi málimetke sáikes, qazirgi kezde Qazaqstanda 2 mln 148 myń adam bazalyq zeinetaqy alyp júr. Olardyń 44,5 protsenti, naqty aitsaq, 940 myń adam bazalyq zeinetaqynyń tolyq mólsherin, iaǵni 28 284 teńgeni alady. Sosyn 931 myńǵa jýyq zeinetker eń tómengi kúnkóris deńgeiine jaqyn 74-90 protsentin alady. Qalǵan 120 myń adam eń tómengi kórsetkish - 15 274 myń teńge ala beredi. Sebebi olardyń eńbek ótili 10 jylǵa da jetpeidi. Bazalyq zeinetaqyny kóterýge respýblikalyq biýdjetten 530 mlrd teńge bólinip otyr.
