QR Básekelestikti qorǵaý jáne damytý agenttigi tóraǵasynyń birinshi orynbasary Rýstam Ahmetov baspana baǵasynyń ósýin tejeý úshin qandai sharalar júrgizilgenin aityp berdi, dep habarlaidy QazAqparat.
«Jyl basynan beri bastapqy turǵyn úidiń baǵasy 5%-ǵa ósti. Qazir dinamika tómendedi. Sońǵy aida shamamen 0,8%-ǵa ósim baiqaldy. Turǵyn úi naryǵyndaǵy baǵa qymbattaýynyń negizgi sebebi – naryqqa 1 trln 200 mlrd teńge zeinetaqy aktivteriniń túsýi edi. Biz baǵanyń ósýin tejeý úshin úi salýshylarǵa baǵanyń tómendeýi týraly 11 eskertý jiberdik, olarmen kelissózder júrgizdik jáne qazir turǵyn úi baǵasynyń dinamikasy turaqtanǵanyn baiqap otyrmyz», - dedi R. Ahmetov Ortalyq kommýnikatsiialar qyzmetinde ótken baspasóz máslihatynda.
Sonymen birge, ol «Birjalyq saýdanyń engizilýine bailanysty benzin baǵasynyń ósýi múmkin be?» degen suraqqa jaýap berdi.
«Qazirgi ýaqytta munai ónimderiniń óndirisi tutyný kólemin tolyǵymen jabady. Tutyný jaǵdaiynda da Atyraý, Shymkent zaýyttaryndaǵy munai ónimderiniń qorlary suranysty qanaǵattandyrýǵa jetkilikti. Bizde benzin tapshylyǵy joq ekenin eskersek, birjalyq saýda-sattyqtyń engizilýine bailanysty baǵanyń kúrt ósýine esh negiz joq», - dep jaýap berdi agenttik ókili.
