Foto: ashyq derekkóz
Qazaqstanda balalarǵa qosymsha bilim berý baǵdarlamalaryn qarjylandyrýda birqatar zańbuzýshylyqtar anyqtaldy, dep habarlaidy Ult.kz.
Jalǵan tirkeý arqyly qatysý kórsetkishterin asyrý, sanitarlyq talaptarǵa sai kelmeitin oryndarda sabaq ótkizý, buryn isti bolǵan azamattardyń balalardy oqytýy jáne sabaqqa qatyspaǵan balalarǵa qarjy bólý sekildi máseleler tirkelgen.
Osyǵan bailanysty 2025 jyldyń 1 maýsymynan bastap alty qalada (Astana, Shymkent, Qaraǵandy, Qyzylorda, Atyraý, Aqtóbe) biryńǵai vaýcher júiesin engizý boiynsha pilottyq joba iske qosylady. Bul júie memlekettik jáne jekemenshik sektsiialar men úiirmelerdi biryńǵai tsifrlyq platformada biriktiredi.
Júieniń negizgi artyqshylyqtary:
-
Vaýcher balaǵa beriledi: Balanyń qalaǵan sektsiiasyn nemese úiirmesin tańdaýǵa jáne aýysýǵa múmkindigi bolady.
-
Qarjylandyrýdyń ashyqtyǵy: Qarajattyń qalai jumsalatyny tolyq tsifrlyq formatta baqylanady.
-
Qaýipsizdik pen sapa: Úiirmeler men sektsiialarda infraqurylym, sanitarlyq jáne órtke qarsy normalardyń saqtalýy mindetteledi.
Vaýcher túrleri:
-
Nysanaly vaýcher: memlekettik mekemelerge arnalǵan jáne kezekke turýdy qajet etpeidi.
-
Ámbebap vaýcher: balanyń ata-anasy eGov.kz portaly arqyly jekemenshik nemese memlekettik emes uiymdy tańdai alady.
Jobany júzege asyrýǵa birneshe memlekettik organ atsalysady, onyń ishinde Mádeniet jáne aqparat, Týrizm jáne sport, Oqý-aǵartý, Tsifrlyq damý ministrlikteri bar.
Bul bastama balalardyń sapaly ári qaýipsiz ortada damýyn qamtamasyz etýge, sondai-aq biýdjet qarajatyn tiimdi paidalanýǵa baǵyttalǵan.
