Elimizde balalar men ata-analardyń tsifrlyq saýattylyǵyn arttyrý úshin «Balalardyń qaýipsizdigi týraly» internet portalyn qurý josparlanǵan. Bul týraly QR Premer-Ministri Asqar Maminniń Senat depýttarynyń saýalyna bergen jaýabynda aitylǵan, dep habarlaidy "Ult aqparat".
«Internetti paidalaný mádenietin arttyrý, internet-qyzmetterdi paidalanýshylardyń jaýapkershiligin tárbieleý maqsatynda bilim berý uiymdarynyń oqýshylary men tárbielenýshileri úshin (3 mln. jýyq oqýshy, ata-analar) «Men OFFLINE», «Qaýipsiz internet» keń aýqymdy aqparattyq naýqandar ótkiziledi. 2019 jyldan bastap internet jelisinde terroristik jáne dini-ekstremistik sipattaǵy materialdardy anyqtaý, esepke alý, baǵalaý jáne olarǵa qol jetkizýdi shekteý jónindegi jumysqa tartylǵan memlekettik organdardyń ózara is-qimylyn ońtailandyrýǵa jáne avtomattandyrýǵa baǵyttalǵan «Kibernadzor» aqparattyq júiesi jumys isteidi», - dedi Úkimet basshysy.
Onyń dereginshe, osy jyldyń basynan beri internet keńistikte bala quqyqtaryn buzýmen bailanysty 1 756 buzýshylyq, sýitsidti, qatygezdikke tabynýdy jáne zorlyq-zombylyqty nasihattaityn 553 material anyqtaldy. Olardy internet resýrstardyń menshik ieleri men ákimshilikteri alyp tastady.
«Qazirgi ýaqytta ýákiletti organdar uiǵarymdar negizinde zańda tyiym salynǵan aqparat qamtylǵan internet resýrstarǵa qol jetkizýdi shekteý boiynsha sharalar qabyldaýda. Balalar men ata-analar úshin Facebook, Instagram áleýmettik jelilerinde jariialanǵan «Balalardy internet jelisindegi ziiandy aqparattan qorǵaý týraly», «Balalardy internettegi ziiandy aqparattan qorǵaý jónindegi ata-analarǵa arnalǵan aqparattyq kýrs» usynymdary ázirlendi, sondai-aq Telegram messendjerinde jedel habarlamalar rejiminde táýlik boiy «BALA QORGAU» chaty uiymdastyrylǵan. Sonymen qatar, balalar men ata-analardyń tsifrlyq saýattylyǵyn arttyrý úshin «Balalardyń qaýipsizdigi týraly» internet portalyn qurý josparlanyp otyr», - dedi Asqar Mamin.
