Elimizde balabaqshalarǵa kezekke turýdyń biryńǵai bazasy qurylady. Bul týraly QR Bilim jáne ǵylym birinshi vitse-ministri Sholpan Karinova aitty, dep habarlaidy QazAqparat.
«Mektepke deiingi bilim berý uiymdarynyń, ásirese jekemenshik balabaqshalar qyzmetiniń sapasy jaqsarady. Memlekettik tapsyrysty ornalastyrý qaǵidalaryna ózgerister engizemiz. Onyń ishinde bilikti pedagogtermen qamtamasyz etip, qaýipsiz jáne qolaily jaǵdai jasaý úshin, memlekettik tapsyrys qarajatyn maqsatty jumsaý jáne qyzmet kórsetý sapasyn arttyrý maqsatynda talaptardy kúsheitemiz», - dedi ol ministrliktiń keńeitilgen alqa otyrysynda.
Sondai-aq birinshi vitse-ministr balabaqshalarǵa kezekke turýdyń biryńǵai bazasyn qurý josparlanǵanyn atap ótti.
«Ol mektepke deiingi bilim berý uiymdaryndaǵy oryndardy bólýdiń ashyqtyǵyn, qarjynyń durys jumsalýyn jáne kezektiń qaitalanbaýyn qamtamasyz etedi», - dedi Sholpan Karinova.
