QR Aýyl sharýashylyǵy vitse-ministri Jeńis Óserbai áleýmettik mańyzy bar azyq-túlik qory týraly aityp berdi, dep habarlaidy QazAqparat.
«Ministrlik apta saiyn ishki naryqty azyq-túlik taýarlarymen qamtamasyz etý monitoringin júrgizedi. Ákimdikterdiń jedel derekterine sáikes, 12 naýryzdaǵy jaǵdai boiynsha respýblikada barlyǵy 1,3 mln tonna áleýmettik mańyzy bar azyq-túlik bar, onyń ishinde un – 144 myń tonna, qant – 90 myń tonna, kúrish – 39,3 myń tonna, makaron – 21 myń tonna jáne shamamen 900 myń tonna kókónis ónimderi jáne basqalary bar. Azyq-túlik qory jańartylady jáne qajettiligine qarai kún saiyn tolyqtyrylady», - dedi spiker ortalyq kommýnikatsiialar qyzmetinde ótken baspasóz máslihatynda.
Sonymen birge Óserbai respýblikada jarma, un jáne basqa da taýarlar óndirý úshin shikizat, et jáne sút ónimderin óndirý úshin mal basy jetkilikti ekenin atap ótti.
«Azyq-túlik taýarlarynyń barlyq derlik túri boiynsha halyq qajettiligi óz óndirisi esebinen qamtamasyz etiledi, al keibirinde óndiris qajettilikten aitarlyqtai asady. Mysaly, jyl saiyn orta eseppen 3 mln tonnadan astam un óndiriledi, al tutyný kólemi – 1,6 mln tonna, kúrish óndirisi de 200 myń tonnany quraidy, al qajettilik – 95 myń tonna. Osylaisha, óndiristiń qazirgi qarqyny saqtalsa jáne tutynýdyń dástúrli kólemderin eskere otyryp, elde azyq-túlik tapshylyǵynyń týyndaýy úshin negiz joq ekenin habarlaimyz», - dedi Jeńis Óserbai.
